Ճապոնիան 900 հազար դոլար կներդնի Հայաստանում կլիմայական ռիսկերի դիմակայունությունն ուժեղացնելու համար

Armenpress 17:37, 10 Մայիս, 2022

ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: Հուշագրի ստորագրմամբ ազդարարվեց Ճապոնիայի կառավարության կողմից ֆինանսավորվող և ՄԱԶԾ կողմից իրականացվող «Աջակցություն Հայաստանում կլիմայական ռիսկերի դիմակայունությանն ուղղված ազգային ներդրումներին» ծրագիրը:

«Արմենպրես»-ի հաղորդմամբ` ճապոնիային  կառավարությունը 900,000 ԱՄՆ դոլարի ներդրում է կատարելու Հայաստանում ՄԱԿ-ի զարգացման ծրագրի  (ՄԱԶԾ) միջոցով: Այն կուժեղացնի երկրի կլիմայական դիմակայունությունը և կօգնի մեծացնել հարմարվողականության միջոցառումները՝ թիրախավորելով նաև կանանց կողմից ղեկավարվող ձեռնարկություններին, խոցելի խավերին և ֆերմերներին:

Լուսանկարները` Մխիթար Խաչատրյանի

ՀՀ շրջակա միջավայրի նախարար Հակոբ Սիմիդյանը նշեց, որ հիդրոօդերևութաբանական երևույթների աճող հաճախականությունն ու ինտեսիվությունը հսկայական կորուստներ և վնասներ են հասցնում հատկապես գյուղատնտեսությանը և ենթակառուցվածքներին: « Այս առումով մենք վստահ ենք, որ ծրագրի շրջանակներում  կատարելագործվող տեխնոլոգիան և մասնագիտական կարողություններն  էապես կնպաստեն այս մարտահրավերների հաղթահարմանը»,- ասաց նախարարը: 

Նա շեշտեց, որ  ծրագրի կարևորագույն ուղղություններից է հիդրոօդերևութաբանության և  մոնիթորինգի ազգային ծառայության տեխնիկական և մասնագիտական կարողությունների զարգացումը, ինչի շնորհիվ նշանակալիորեն կբարելավվի եղանակի կանխատեսման արդյունավետությունը՝ հնարավորություն տալով ավտոմատ դիտակայանների և ինտեգրված թվային տվյալների վերլուծական բազայի ձևավորման և կառավարման միջոցով ապահովել հավաստի և ժամանակին տրամադրվող տեղեկատվություն մեր ազգաբնակչությանը, ֆերմերային տնտեսություններին, ջրային կառավարման համակարգին և այլ պետական և մասնավոր գործընկերների։

Հայաստանում ՄԱԶԾ մշտական ներկայացուցիչ Նաթիա Նացվիլաշվիլին ընդգծեց, որ նոր նախաձեռնությունը հիմնված է ՄԱԶԾ-ի, կառավարության և այլ շահագրգիռ կողմերի հետ կլիմայի, շրջակա միջավայրի և աղետների ռիսկի նվազեցման ոլորտներում սերտ և հաջողված համագործակցության և բարձր արդյունքների վրա՝ նպաստելով ազգային առաջնահերթությունների իրականացմանը Փարիզյան համաձայնագրով  երկրի պարտավորություններին համահունչ:

Խոսելով այս նոր գործընկերության ռազմավարական նպատակների մասին՝ Հայաստանում Ճապոնիայի արտակարգ և լիազոր դեսպան Մասանորի Ֆուկուսիման նշեց, որ ժամանակակից աշխարհում, երբ կլիմայի փոփոխության և գլոբալ տաքացման վտանգը սպառնում է բոլորին, պետք է ժամանակին և արդյունավետ միջոցներ ձեռնարկել աղետից խուսափելու համար:

«Ես հուսով եմ, որ այս օժանդակությունը ժամանակին և տեղին կլինի՝ նվազեցնելու կլիմայի փոփոխության ռիսկերը և հասնելու արտանետումների կրճատմանը, որը նախատեսվում է զգալիորեն նվազեցնել մինչև 2030 թվականը»,- եզրափակեց դեսպանը:

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am