Հայոց բանակի օրվա առթիվ Գեղարքունիքի մարզի բժշկական կենտրոններում կազմակերպվել է «Բաց դռների օր»
ԳԱՎԱՌ, 28 ՀՈՒՆՎԱՐԻ, ԱՐՄԵՆՊՐԵՍ։ ՀՀ Գեղարքունիքի մարզպետ Կարեն Սարգսյանի նախաձեռնությամբ Գավառի, Մարտունու, Սևանի, Վարդենիսի բժշկական կենտրոններում և Ճամբարակի առողջության կենտրոնում կազմակերպվել և անցկացվել է «Բաց դռների օր»՝ Հայոց բանակի հիմնադրման 32-րդ տարեդարձի առիթով։
Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, «Բաց դռների օրվա» ընթացքում անվճար հիմունքներով հետազոտվելու, խորհրդատվություն կամ բուժում ստանալու հնարավորությունից օգտվել են Ղարաբաղյան պատերազմների մասնակիցները, վիրավոր զինծառայողները, կամավորականները և սպայական անձնակազմի ընտանիքների, պատերազմի ընթացքում զոհված կամ վիրավորված զինծառայողների և կամավորների ընտանիքների անդամները։
Բժշկական կենտրոններում հետազոտություններն իրականացրել են մարզի բուժհիմնարկների և մայրաքաղաքից հրավիրված լավագույն մասնագետները։
Ողջ օրվա ընթացքում մարզի բժշկական կենտրոններում կազմակերպված բաց դռների ընթացքում բուժաշխատողներն ընդունել են առողջական տարբեր խնդիրներով դիմած շուրջ 241 քաղաքացու։
Խոսրով Խլղաթյան