Աբդոլլահիանի համոզմամբ՝ ՀՀ և Իրանի միջև համակողմանի հարաբերությունների զարգացումը կնպաստի տարածաշրջանի խաղաղությանը
ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Իրանի արտաքին գործերի նախարար Հոսեյն Ամիր Աբդոլլահիանը ՀՀ փոխարտգործնախարար Վահան Կոստանյանի հետ հանդիպմանը համոզմունք է հայտնել, որ երկու երկրների միջև համակողմանի հարաբերությունների զարգացումը կնպաստի տարածաշրջանում կայուն խաղաղության և անվտանգության հաստատմանը` առանց արտաքին միջամտության:
«Արմենպրես»-ի հաղորդմամբ՝ այս մասին հայտնում է IRNA-ն՝ հավելելով, որ Հայաստանի փոխարտգործնախարարի և Աբդոլահիանի հանդիպումը կայացել է մարտի 9-ին Թեհրանում
Ըստ աղբյուրի՝ իրանցի նախարարը կարևորել է Իրանի և Հայաստանի միջև համագործակցության ամրապնդմանն ուղղված համատեղ ջանքերը տարբեր ոլորտներում, ինչպիսիք են քաղաքականությունը, տնտեսությունը, առևտուրը, գիտությունը և մշակույթը:
Վահան Կոստանյանն իր հերթին իրանցի ԱԳ նախարարին է փոխանցել ՀՀ ԱԳ նախարար Արարատ Միրզոյանի ողջույնները և անդրադարձել Իրանի փոխարտգործնախարարի հետ ունեցած քննարկումներին։
Մարտի 9-ին Թեհրանում ՀՀ և Իրանի ԱԳ նախարարությունները անցկացրել են քաղաքական խորհրդակցություններ, որոնց ընթացքում ընդունել են հայտարարություն. մասնավորապես, անդրադառնալով Հայաստանի և Ադրբեջանի միջև ընթացող խաղաղության բանակցություններին՝ կողմերն ընդգծել են բացառապես խաղաղ միջոցներով առկա հարցերի լուծման կարևորությունը՝ կայուն խաղաղության հասնելու և տարածաշրջանային կապակցվածությունն ու Հարավային Կովկասում համագործակցությունն ամրապնդելու համար։ Այս առնչությամբ երկուստեք կարևորվել է ինքնիշխանության, իրավազորության, հավասարության, փոխադարձության և միջազգայնորեն ճանաչված սահմանների անքակտելիության սկզբունքների հարգման անհրաժեշտությունը։