Գինու միջազգային համաժողովը գինեգործների համար հետաքրքիր հարթակ կարող է դառնալ. Իգնատի Առաքելյան
ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ։ «Գինու համաշխարհային միտումները և լավագույն փորձը. հետևություններ ու առաջարկություններ Հայաստանի համար» միջազգային երկօրյա համաժողովի շնորհիվ գինեգործները հնարավորություն ունեն ծանոթանալ միջազգային փորձին և քննարկել ոլորտի հետագա զարգացման հարցերը։ «Արմենպրես»-ի հաղորդմամբ՝ ՀՀ գյուղատնտեսության նախարար Իգնատի Առաքելյանը նշեց, որ համաժողովը Հայաստանում առաջին անգամ է կայանում։ «Մեզ համար շատ առանցքային նախաձեռնություն է՝ ընդգծելու համար այս ոլորտի կարևորությունը։ Միջազգային կառույցները, Հայաստանում Ֆրանսիայի դեսպանատունը մեծ աջակցություն են ցուցաբերել միջազգային մասնագետների ներգրավման և ֆինանսական առումով։ Մենք համոզված ենք, որ համաժողովը գինեգործների համար հետաքրքիր հարթակ կդառնա, որտեղ կկարողանան քննարկել ապագա զարգացման հարցերը, ինչպես նաև կծանոթանան միջազգային փորձին»,- ասաց նախարարը։ Նա ընդգծեց, որ համաժողովի հյուրերը կարող են ծանոթանալ ավելի քան 6000 տարվա պատմություն ունեցող գինու երկրին և իր ավանդույթներին։