Աքարը Ջեֆրիի հետ քննարկել է Սիրիայի թեման
ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Թուրքիայի պաշտպանության նախարար Հուլուսի Աքարը հանդիպել է Սիրիայում ԱՄՆ-ի հատուկ ներկայացուցիչ Ջեյմս Ջեֆրիին:
Այս մասին, ինչպես հաղորդում է «Արմենպրես»-ը, հայտնում է գերմանական «Deutsche Welle» լրատվամիջոցը:
Պաշտպանության նախարարության հրապարակած տեղեկատվության համաձայն՝ հանդիպման ընթացքում քննարկվել են Սիրիայում՝ Եփրատի արևելյան շրջաններում, «անվտանգ գոտի» ստեղծելու միջոցով «Իսլամական պետության» դեմ պայքարելու թեման և Սիրիայում տեղի ունեցող վերջին զարգացումները:
Կողմերը համաձայնության են եկել, որ Սիրիայում «անվտանգ գոտի» ստեղծելու գործում համագործակցելու են:
Հանդիպման ընթացքում խոսվել է նաև սիրիացի փախստականների մասին, և նախարար Աքարը նշել է, որ փախստականների վերադարձի համար անհրաժեշտ պայմաններ է պետք ապահովել: