ԳԱՎԱՌ, 7 ԱՊՐԻԼԻ, ԱՐՄԵՆՊՐԵՍ։ Կանանց տոնի միամսյակին նվիրված ցերեկույթների շարքը Գեղարքունիքի մարզում եզրափակվեց Գավառի Լեւոն Քալանթարի անվան դրամատիկական թատրոնում կայացած հանդիպմամբ։ «Արմենպրես»-ի տեղեկացմամբ՝  հանդիպման մասնակիցները դիտեցին Երեւանի Սոս Սարգսյանի անվան համազգային թատրոնի դերասանների կողմից բեմադրված «Եվ նորից գարուն» ներկայացումը:

Տոնական միջոցառմանը հրավիրված էին Գեղարքունիքի մարզային ենթակայության կրթամշակութային եւ առողջապահական հաստատությունների, Գավառի պետական համալսարանի, Գեղարքունիքի մարզպետարանի, մարզի համայնքապետարանների եւ նրանց ենթակայությամբ գործող հիմնարկների, մարզի ուժային կառույցների, Գեղարքունիքի ՋՕԸ կին աշխատակիցներ:

Կանանց տոնի առթիվ ներկաներին ողջունեցին եւ շնորհավորեցին  Գեղարքունիքի մարզպետ Կարեն Սարգսյանը եւ Գեղարքունյաց թեմի առաջնորդական տեղապահ Տեր Պարթեւ վարդապետ Բարսեղյանը:

Միջոցառման ընթացքում գրական-երաժշտական կատարումներով հանդես եկան  Գեղարքունիքի մարզպետարանի ԿՄՍ վարչության մասնագետ Արփիկ Չքոլյանը, Սարուխանի արվեստի դպրոցի «Զանգեզուր» պարային համույթը եւ երգիչ, վոկալիստ Էդգար Ավետիսյանը:

Խոսրով Խլղաթյան