Վահան Քերոբյանը վստահ է, որ էկոնոմիկայի նախարարության ձերբակալված աշխատակիցներն օրենքի խախտում թույլ չեն տվել
ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ։ Հայաստանի էկոնոմիկայի նախարար Վահան Քերոբյանն անդրադարձել է նախօրեին էկոնոմիկայի նախարարությունում իրավապահ մարմինների իրականացրած քննչական գործողություններին, որի հետևանքով կան ձերբակալվածներ։
Ինչպես հաղորդում է «Արմենպրես»-ը, Քերոբյանը թեմային անդրադարձել է ՀՀ կառավարության նիստից հետո լրագրողների հետ զրույցում։
Էկոնոմիկայի նախարարը նախ նշեց, որ հարկավոր է առաջնորդվել անմեղության կանխավարկածով, այսինքն՝ քանի դեռ չկա դատական վճիռ, անձը չի կարող մեղավոր համարվել։
Նախարարը ուշադրություն հրավիրեց այն հանգամանքին, որ այդ առթիվ Քննչական կոմիտեի հաղորդագրությունում բացակայում են «կաշառք» և «որևէ այլ կերպով շահագրգռված լինել» ձևակերպումները:
«Եթե ուշադիր կարդաք Քննչական կոմիտեի հայտարարությունը, ապա կնկատեք, որ առաջին դրվագով, որը վերաբերում է Անի Իսպիրյանին (խմբ․ էկոնոմիկայի նախարարի՝ աշխատանքից ազատված տեղակալ), բացակայում է երկու կարևոր արտահայտություն՝ «կաշառք» կամ «որևէ այլ կերպով շահագրգռված լինել»: Եվ չկա «բյուջեի փողերի ծախս», այսինքն՝ այդ դրվագով բյուջեի միջոցներ չեն ծախսվել: Չկա որևէ կերպ մոտիվացված լինելու հանգամանք»,- հայտարարեց Քերոբյանը:
Նա վստահ է, որ իրականում Գնումների մասին և դրա հետ փոխկապակցված օրենքների որևէ խախտում չի եղել. «Ինձ համար մի փոքր լրացուցիչ պարզաբանման կարիք ունի, թե ինչ է նշանակում չարաշահում: Այդ տենդերային գործընթացը անընդհատ եղել է իրավաբանների և մյուս գործընկերների, այդ թվում՝ ֆինանսների նախարարության հսկողության ներքո: Մենք ավելի քան վստահ ենք, որ դատարանում կամ քննությամբ կպարզվի, որ Գնումների մասին և դրա հետ փոխկապակցված օրենքների որևէ խախտում չի լինի: Պետք է սպասենք, որպեսզի Քննչական կոմիտեի գործընկերներն ասեն, թե ինչ են հասկանում չարաշահում ասելով: Պետք է բացատրեն, թե ինչ նկատի ունեն առերևույթ կոռուպցիա ասելով: Դա պետք է լինի կաշառք, իր բարեկամին տենդեր նվիրել և դրա ներքո փողերի տեղաշարժ, որը չկա»,- մանրամասնեց էկոնոմիկայի նախարարը:
Անդրադառնալով իր ղեկավարած գերատեսչության մի խումբ այլ աշխատակիցներին ներկայացված մեղադրանքին՝ Քերոբյանն ընդգծեց, որ այդ դեպքում ևս բացակայում է «կաշառք» կամ «որևէ այլ կերպ մոտիվացված լինել» ձևակերպումը: «Էկոնոմիկայի նախարարության աշխատակիցներն անում են տասնյակ միլիարդավոր դրամի գործարքներ. մեր այս տարվա բյուջեն 91 մլրդ դրամ է: Պարզ է, որ որոշ տնտեսվարողներ կարող են չարաշահել»,- ասաց նախարարը:
Նա հավելեց, որ ինչպես մյուս ծրագրերի պարագայում, աղմկահարույց այս ծրագրի դեպքում էլ իրեն պարբերաբար զեկուցել են կատարման ընթացքի մասին: «Դա, ըստ էության, կառավարության միջոցառումների ծրագրի բաղկացուցիչ մասն է՝ Հանրային ներդրումային բանկ: Ես խստիվ հանձնարարել եմ մնալ օրենքի շրջանակներում, և ավելի քան վստահ եմ, որ հենց այդպես էլ կա»,- եզրափակեց Վահան Քերոբյանը:
Նախարարը նաև հիշեցրեց, որ վերջին անգամ ՀՀ էկոնոմիկայի նախարարությունում նման աղմկահարույց դեպք գրանցվել էր 2021 թվականի հունվարի 29-ին, սակայն այն ժամանակ ձերբակալված մարդկանց գործով մինչ օրս դատավճիռ չի կայացվել:
Հայաստանի քննչական կոմիտեն և Ազգային անվտանգության ծառայությունը հարուցված երկու քրեական վարույթների շրջանակներում հունվարի 31-ին գործողություններ էին իրականացրել էկոնոմիկայի նախարարությունում, խուզարկություններ իրականացրել մի խումբ անձանց բնակավայրերում։ Գործողությունների արդյունքներով քննչական կոմիտեն ավելի ուշ հաղորդագրություն տարածեց՝ հայտնելով 7 անձի ձերբակալության մասին։ Նրանց թվում է նաև էկոնոմիկայի նախարարի՝ աշխատանքից ազատված տեղակալ Անի Իսպիրյանը։
Բաժանորդագրվեք մեր ալիքին Telegram-ում