ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: «Ֆրանկոֆոնիայի օրեր 2024» ամենամյա միջոցառումը, լինելով Հայաստանում Ֆրանսիայի դեսպանության մշակութային օրակարգի կարևորագույն ծրագրերից մեկը, նվիրվելու է հայ նշանավոր դիվանագետ Քրիստիան Տեր-Ստեփանյանին: 

«Արմենպրես»-ի փոխանցմամբ՝ այս մասին մամուլի ասուլիսի ժամանակ ասաց Ֆրանսիայի արտակարգ և լիազոր դեսպան Օլիվիե Դըկոտինյին:

Դեսպանն ընդգծեց Հայաստանի ակտիվ մասնակցությունը Ֆրանկոֆոնիայի միջազգային կազմակերպությանը՝ հիշեցնելով, որ ֆրանսերենը հանրապետությունում տարածվածությամբ երրորդ լեզուն է ռուսերենից և անգլերենից հետո։ Դիվանագետի խոսքով՝ Հայաստանի մասնակցությունը կազմակերպությանը, որը գտնվում է բարդ աշխարհաքաղաքական իրավիճակում, կընդլայնի շփման հորիզոնները ֆրանսերեն խոսողների հետ, որոնց թիվն աշխարհում 144 մլն է։ 

«Հայաստանը Ֆրանկոֆոնիայի միջազգային կազմակերպության ակտիվ, շատ ազդեցիկ և շատ սիրված անդամ երկիր է: Հայաստանի համար Ֆրանկոֆոնիայի միջազգային կազմակերպության անդամ լինելը միայն քաղաքական և տնտեսական բաղադրիչ չունի, այլ նաև մեծ մշակութային բաղադրիչ է պարունակում»,-նշեց դեսպանը:  

Նա հիշեցրեց, որ հոկտեմբերի 4-ին Ֆրանսիայում տեղի է ունենալու կազմակերպության հերթական գագաթաժողովը, որին մասնակցելու է Հայաստանը։  

«Ֆրանկոֆոնիայի օրերի շրջանակում տեղի կունենա ավելի քան 30 միջոցառում՝ կինոյի, թատրոնի, ժամանակակից արվեստի, երաժշտության ժանրերում։ Կարևոր է, որ միջոցառումները տեղի են ունենալու ոչ միայն մայրաքաղաքում, այլև Գյումրիում, Գավառում և Վանաձորում։ Ֆանկոֆոնիան միայն մայրաքաղաքի համար չէ, Ֆրանկոֆոնիան միայն էլիտայի համար չէ, այն Հայաստանում ուղղված է բոլորին՝ անկախ նրանց գտնվելու վայրից»,-ասաց Դըկոտինյին:  

ԿԳՄՍ նախարարի տեղակալ Արթուր Մարտիրոսյանը վերահաստատեց ՀՀ կառավարության հանձնառությունը Ֆրանկոֆոնիայի արժեքներին՝ այդ թվում համերաշխությանը, հանդուրժողականությանը, մասնակցությանը և խաղաղ համակեցությանը:  

«Այս տարի 325 կրթական ու մշակութային հաստատություն տոնելու է Ֆրանկոֆոնիայի միջազգային օրը՝ ամբողջ տարվա ընթացքում կազմակերպելով շուրջ 1000 միջոցառում: Գլխավոր միջոցառումն, իհարկե, մարտի 20-ի համերգն է Կոմիտասի անվան Կամերային երաժշտության տանը, որը մենք կազմակերպում ենք ԱԳ նախարարության և Հայաստանում Ֆրանկոֆոն դեսպանների համակարգող խմբի ու ՀՀ-ում Ֆրանսիայի դեսպանատան հետ համատեղ: Միջոցառումը կնշանավորվի Հայաստանի պետական կամերային երգչախմբի և «Հնագույն երաժշտության տաղարան» համույթի համերգով»,-ներկայացրեց Արթուր Մարտիրոսյանը: 

ԿԳՄՍ նախարարի տեղակալը նաև տեղեկացրեց՝ ՀՀ-ում ֆրանսերեն սովորող աշակերտների թիվն արդեն հասել է 62 հազարի: Այս պահին ՀՀ-ում գործող շուրջ 250 դպրոցում դասավանդվում է ֆրանսերեն, իսկ ուսուցիչների թիվը 364 է: 

«Սա ցույց է տալիս մեր հանրության շրջանում ֆրանսերենի հանդեպ մեծացող հետաքրքրությունը, որն իրականություն է դառնում նաև այն գործուն աջակցության շնորհիվ, որ մենք ստանում ենք ՀՀ-ում Ֆրանսիայի դեսպանատան և Ֆրանսիական ինստիտուտի կողմից: Անցյալ տարի ֆրանսերենի խորացված ուսուցում և առանձին ֆրանկոֆոն ծրագիր իրականացնող դպրոցների թվին ավելացավ ևս մեկը՝ Անդրանիկ Մարգարյանի թիվ 29 ավագ դպրոցը: Այս դպրոցները հանդես կգան որպես ռեսուրսային դպրոցներ՝ այլ դպրոցների ուսուցիչների վերապատրաստման համար»,-մանրամասնեց Արթուր Մարտիրոսյանն՝ ընդգծելով, որ Ֆրանկոֆոնիայի միջազգային համագործակցության շրջանակում Հայաստանը մասնակցում է նաև տարբեր ձևաչափերով հանդիպումներին: 

ԿԳՄՍ նախարարի տեղակալը կարևորեց Ֆրանսիայի դեսպանատան հետ նոր նախաձեռնությունը, որը հնարավորություն կտա Հայաստանում ֆրանսերեն դասավանդող ուսուցիչների վերապատրաստողների կայուն խումբ ունենալ, որը շարունակաբար կաշխատի ուսումնական նյութերի զարգացման ուղղությամբ: 

Հայաստանում Շվեյցարիայի դեսպան, ֆրանկոֆոն դեսպանների խմբի նախագահ Լուկաս Ռոզենկրանցն ընդգծեց, որ Ֆրանկոֆոնիայի միջազգային կազմակերպությունը մի հարթակ է, որը մի ընդհանուր լեզվի միջոցով զարգացնում է իր անդամ պետությունների միջև մշակութային, կրթական և տնտեսական համագործակցությունն՝ ի նպաստ ժողովուրդների: 

«Ֆրանկոֆոնիան նաև արժեքներ է. համերաշխությունը, բազմազանություն, փորձի փոխանակում, հանձնառություն: Հենց դրանք մեծ կարևորություն ունեն այն աշխարհում, որտեղ ապրում ենք, որը բավականին պառակտված է և լի է տարաձայնություններով: Ֆրանկոֆոնիայի միջազգային կազմակերպության հիմնական նպատակն է անդամ երկրների միջև կիսելու բոլոր արժեքները, զարգացնելու քաղաքական, մշակութային և տնտեսական գործակցությունը: Յուրաքանչյուր երկիր իր ավանդն է ներդնում։ Հայաստանն այն երկրներից է, որի ավանդը հատկապես հատկանշական է՝ հաշվի առնելով նրա ոչ մեծ չափերը։ Հայաստանը բաց է բոլոր այլ մշակույթների համար։ Փոխադարձ հարստացումը թույլ է տալիս ստեղծել համամարդկային արժեքներ, ինչը ցուցադրում է Հայաստանը»,-ասաց դեսպանը:  

ԱԳՆ բազմակողմ քաղաքականության և համագործակցության զարգացման վարչության պետ Դավիթ Կնյազյանը տեղեկացրեց, որ Երևան կայցելի հայտնի ֆրանսիացի գրող Սիլվեն Թեսոնը։ Մարտի 18-ին Ազգային գրադարանում տեղի կունենա նրա ստեղծագործության մոտիվներով նկարահանված «Սև ճանապարհին» ֆիլմի ցուցադրությունը։ Այնուհետև կկազմակերպվի քննարկում Թեսոնի մասնակցությամբ։ Միջոցառումների լրիվ ցանկը առաջիկա օրերին կհրապարակվի ՀՀ ԱԳՆ կայքում։

«Տարեցտարի Ֆրանկոֆոնիայի երկամսյակի ներկայացուցչական և բազմազան դառնալը ի ցույց է դնում Հայաստանի և Ֆրանկոֆոնիայի միջազգային կազմակերպության միջև կապերի խորացումը և Հայաստանում Ֆրանկոֆոնիայի արժեքների տարածումը»,-ընդգծեց Կնյազյանը:   

2027-ին Հայաստանը կընդունի ֆրանկոֆոն խաղերը, որոնց կմասնակցի ավելի քան 4 հազար ներկայացուցիչ 50 երկրից։ 

Ֆրանսիայի դեսպանի՝ մշակույթի և համագործակցության հարցերով խորհրդական Գիյոմ Նարժոլեն շնորհակալություն հայտնեց բոլոր գործընկերներին՝ նշելով, որ առանց իրենց պատրաստակամության հնարավոր չէր լինի որևէ  բան կազմակերպել:

Մարտի 9-ից ապրիլի 27-ը Ֆրանկոֆոնիայի օրերի շրջանակներում Ֆրանսիայի դեսպանության/Հայաստանի Ֆրանսիական ինստիտուտի հետ համագործակցությամբ Հայաստանի ազգային կամերային նվագախումբը կներկայացնի երեք համերգային ծրագիր:

Երրորդ տարին անընդմեջ Ֆրանսիայի դեսպանությունը/Հայաստանի Ֆրանսիական ինստիտուտը, Ֆիլմադարան ՀԿ-ի հետ համատեղ Հայաստանի ազգային գրադարանում կազմակերպում են ֆրանսիական կինոյին նվիրված կինոակումբ, որը կմեկնարկի մարտի 12-ից: 

Սոնա Մալինցյան, Դավիթ Կնյազյան, Լուկաս Ռոզենկրանց, Օլիվիե Դըկոտինյի, Արթուր Մարտիրոսյան, Գիյոմ Նարժոլե Գիյոմ Նարժոլե Արթուր Մարտիրոսյան Օլիվիե Դըկոտինյի Դավիթ Կնյազյան, Լուկաս Ռոզենկրանց, Օլիվիե Դըկոտինյի, Արթուր Մարտիրոսյան, Գիյոմ Նարժոլե Սոնա Մալինցյան, Դավիթ Կնյազյան, Գիյոմ Նարժոլե Օլիվիե Դըկոտինյի, Արթուր Մարտիրոսյան Լուկաս Ռոզենկրանց, Օլիվիե Դըկոտինյի, Արթուր Մարտիրոսյան Լուկաս Ռոզենկրանց

Լուսանկարները` Գևորգ Պերկուպերկյանի

Ֆրանկոֆոն կինոյի 7-րդ փառատոնը կազմակերպում է Ֆրանսիայի դեսպանությունը / Հայաստանի ֆրանսիական ինստիտուտը՝ Շվեյցարիայի, Բելգիայի և Կանադայի դեսպանությունների հետ գործընկերությամբ:

Այս կարևոր կինեմատոգրաֆիական հանդիպման ընթացքում Մոսկվա կինոթատրոնում կցուցադրվեն վերջին երկու տարիների արտադրության ինը ֆիլմ:

Միջոցառումների մասին հավելյալ տեղեկություններ ներկայացված են Ֆրանսիական ինստիտուտի «ֆեյսբուք»-ի պաշտոնական էջում: