ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ։ Ռուս հայտնի երգչուհի Իրինա Ալեգրովայի՝ Երևանում մարտի 5-ին նախատեսված համերգը չի կայանա: Կազմակերպիչները հայտարարում են, որ չեղարկված համերգի բոլոր վաճառված տոմսերը ենթակա են վերադարձման։ 

«Արմենպրես»-ի հաղորդմամբ՝ «Ֆորպոստարտ պրոդաքշն» ընկերության պաշտոնական կայքէջը հաղորդում է, որ տոմսերի հետ ընդունման գործընթացն ամբողջությամբ կիրականացվի մինչև մարտի 5-ը։ Տոմսերը ենթակա են վերադարձման այն տոմսարկղերում, որտեղից դրանք ձեռք են բերվել։ 
Իրինա Ալեգրովայի պաշտոնական կայքէջում հայտարարություն է զետեղված, որ իր համերգը հետաձգվում է տեխնիկական խնդիրների պատճառով։ 
«Հարգելի հանդիսատես, մարտի 5-ին Երևանում կայանալիք` Իրինա Ալեգրովայի համերգը տեխնիկական պատճառներով չեղարկվում է: Խնդրում ենք ըմբռնմամբ մոտենալ առաջացած հանգամանքներին, և հույս ունենք, որ Ալեգրովայի հանդիպումը երևանյան հանդիսատեսի հետ մոտ ժամանակներս կկայանա: Հայցում ենք ձեր ներողամտությունը ստեղծված իրավիճակի կապակցությամբ և հայտնում ենք մեր երախտագիտությունը ըմբռնման համար»,-ասված է Իրինա Ալեգրովայի ադմինիստրացիայի տարածած հայտարարությունում: