ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Հայ դասական սիմֆոնիկ երաժշտության հիմնադիր, կոմպոզիտոր Ալեքսանդր Սպենդիարյանի ծննդյան 152-րդ տարեդարձին նվիրված` կոմպոզիտորի տուն-թանգարանում վերաբացվել է մշտական ցուցադրությունը՝ նոր գեղարվեստական ձևավորմամբ։

Ինչպես «Արմենպրես»-ին տեղեկացրին ՀՀ կրթության, գիտության, մշակույթի և սպորտի նախարարությունից, միջոցառման բացմանը ՀՀ ԿԳՄՍ նախարարի տեղակալ Ալֆրեդ Քոչարյանն անդրադարձել է թանգարանի մշտական նոր ցուցադրության  բարձր որակին, ինչը տեսանելի վկայությունն է  տուն-թանգարանի  ակտիվ մշակութային գործունեության:

«Նախարարի տեղակալը նշել է, որ տուն-թանգարանը մշտապես աչքի է ընկել նորագույն տեխնոլոգիաների կիրառմամբ և հույս հայտնել, որ ապագայում ևս կհամալրվի տեխնիկական նոր բաղադրիչներով:

Ի հավելումն Ալֆրեդ Քոչարյանի խոսքի` թանգարանի տնօրեն Մարինե Օթարյանը նշել է, որ  այցելուներն այսուհետ  հնարավորություն կունենան տեղում ունկնդրելու կոմպոզիտորի ջութակի ձայնը, մասնավորապես, Սպենդիարյանի «Վալս» ստեղծագործությունը՝  ջութակահար Կարեն Շահգալդյանի կատարմամբ»,- ասվում է հաղորդագրության մեջ։

Ըստ աղբյուրի՝ ցուցադրության հեղինակն է «Քուադրում» ճարտարապետական արվեստանոցի հիմնադիր, ճարտարապետ Արև Սամուելյանը: Միջոցառման շրջանակում Արև Սամուելյանը տուն-թանգարանին է նվիրել երկու նամակ, որոնք իր պապին՝ մշակութային և հասարակական գործիչ Մարկ Պետրոսյանին գրել է Սպենդիարյանի դուստր, թանգարանի հիմնադիր Մարինա Սպենդիարովան:

Նշվում է, որ միջոցառմանը ներկա են  եղել տուն-թանգարանի գիտական խորհրդի անդամները, անվանի արվեստագետներ և մտավորականներ։ «Մեղեդի» լարային քառյակի կատարմամբ հնչել են Սպենդիարյանի և այլ կոմպոզիտորների դասական ստեղծագործություններ։