Կարմիրգյուղում բացվել է ռուսերենի հավելյալ կրթական կենտրոն
ԳԱՎԱՌ, 23 ՓԵՏՐՎԱՐԻ, ԱՐՄԵՆՊՐԵՍ։ Գեղարքունիքի մարզի Գավառ համայնքի Կարմիրգյուղ բնակավայրում «Ռոսսոտրուդնիչեստվո» գիտության և մշակույթի կենտրոնի նախաձեռնությամբ, «Ռոսիա» հայրենակիցների ՀԿ-ի աջակցությամբ և Գավառի համայնքապետարանի հետ համագործակցությամբ այսուհետ գործելու է ռուսական կրթական կենտրոն։
Ինչպես «Արմենպրես»-ը տեղեկացավ Գավառի համայնքապետարանի աշխատակազմից՝ Կենտրոնի բացման արարողությանը ներկա են գտնվել և կարմիր ժապավենը կտրել են Հայաստանում Ռուսաստանի արտակարգ և լիազոր դեսպան Սերգեյ Կոպիրկինը, Հայաստանում «Ռոսսոտրուդնիչեստվո»-ի ղեկավար Վադիմ Ֆեֆիլովը և Գավառ համայնքի ղեկավարի առաջին տեղակալ Գրիգոր Դաշտոյանը։
Կենտրոնում, բացի երեխաների և մեծահասակների համար իրականացվող ռուսաց լեզվի անվճար դասընթացներից, կանցկացվեն նաև տարբեր ակումբային պարապմունքներ, միջոցառումներ և մրցույթներ:
Այն վերանորոգված է, կահավորված և ունի հարուստ գրադարան, որից կարող են օգտվել նաև ուսանողները։
Գավառի համայնքապետարանի աշխատակազմի տեղեկացմամբ՝ դեսպան Սերգեյ Կոպիրկինը Գեղարքունիքի մարզ կատարած շրջայցի ընթացքում այցելել է Գավառ համայնքի Գանձակ բնակավայրի՝ МИР ռուսաց լեզվի և մշակույթի մանկական կենտրոն։
Կենտրոնը ստեղծվել է անցած տարվա մայիսին՝ Հայաստանում МИР հիմնադրամի (Միջազգային զարգացման ինստիտուտ) կողմից` Ռուսաստանի Հաղորդակցության զարգացման ազգային գիտահետազոտական ինստիտուտի աջակցությամբ և Գավառի համայնքապետարանի հետ համագործակցությամբ։
Դեսպանն այցելել է կենտրոն, տեղում ծանոթացել հաստատության գործունեությանը և մասնակցել կենտրոնի սաների կողմից ներկայացված միջոցառմանը։
«Սա ռուսաց լեզվի և մշակույթի՝ Հայաստանում գործող երեք նմանատիպ կենտրոններից մեկն է, որտեղ անվճար հիմունքներով արդեն հաճախում է 10-16 տարեկան 45 երեխա: Այստեղ հնարավորություն ունեն ոչ միայն սովորել ռուսաց լեզու, այլև ծանոթանալ Ռուսաստանի պատմությանն ու մշակույթին։
Կենտրոնը հագեցած է ժամանակակից սարքավորումներով և մեծ գրադարանով»,-ներկայացրին Գավառի համայնքապետարանի աշխատակազմից։
Խոսրով Խլղաթյան
Բաժանորդագրվեք մեր ալիքին Telegram-ում