ՀԱՕԿ նախագահը հյուրընկալել է բասկետբոլի Եվրոպայի առաջնության C դիվիզիոնի չեմպիոն Հայաստանի ընտրանուն
ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Հայաստանի ազգային օլիմպիական կոմիտեի նախագահ Գագիկ Ծառուկյանը հյուրընկալել է բասկետբոլի Եվրոպայի առաջնության C դիվիզիոնի չեմպիոն Հայաստանի մինչև 18 տարեկանների հավաքականի և մարզչական շտաբի անդամներին, ինչպես նաև ֆեդերացիայի ղեկավար կազմին:
«Ի սրտե շնորհավորում եմ Ձեզ հաջող ելույթների կապակցությամբ և ուզում եմ իմ խորին շնորհակալությունը հայտնել: Ձեզ հաջողվեց մեր երկրի, պետության պատիվը բարձր պահել, ինչպես դա արեց տղամարդկանց հավաքականը:Հայաստանն օրեր շարունակ խոսում էր այս հաղթանակի մասին, իսկ անձամբ իմ ուրախությանը չափ չկար:Իհարկե, այս գործում իր ավանդն ունի նաև ֆեդերացիայի նախագահը՝ Հրաչյա Ռոստոմյանը, ով նվիրված աշխատում է և, ինչպես տեսնում եք աշխատանքը տալիս է իր ցանկալի արդյունքը: Յուրաքանչյուր հարցում ձեր կողքին կանգնած եմ և թող հաջողությունն ու հաղթանակը միշտ ուղեկից լինի ձեզ, Աստված ձեզ պահապան»,- ողջունելով մարզիկներին և ներկաներին ասել է Գագիկ Ծառուկյանը:
«Արմենպրես»-ի փոխանցմամբ, այս մասին հաղորդում է Հայաստանի ազգային օլիմպիական կոմիտեն:
Հայաստանի մինչև 18 տարեկանների հավաքականի անդամներն և թիմի գլխավոր մարզիչ Վահագն Հարությունյանը ՀԱՕԿ նախագահին են նվիրել խորհրդանշական մեդալը և թիմի անդամների ստորագրությամբ գնդակը: Ավանդույթի համաձայն չեմպիոնական գավաթը ի պահ է տրվել «Օլիմպավան»-ի թանգարանին:
Լուսանկարը՝ ՀԱՕԿ պաշտոնական կայքից
Բաժանորդագրվեք մեր ալիքին Telegram-ում