ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ կառավարությունը հետաձգեց Ազգային ժողովի ԲՀԿ խմբակցության պատգամավորներ Նաիրա Զոհրաբյանի և Միքայել Մելքումյանի՝ «Նաիրիտ գործարան» ՓԲԸ գործունեության և կառավարման հատուկ ռեժիմ սահմանելու մասին» օրենքի նախագծի քննարկումը: «Արմենպրես»-ի փոխանցմամբ, ՀՀ Էներգետիկայի և բնական պաշարների նախարար Աշոտ Մանուկյանը նշեց, որ նախագիծը լրացուցիչ աշխատանք է պահանջում, քանի որ կառավարության կողմից մերժումը կարող է հանրային մեծ դժգոհություն առաջացնել: Նախարարը երեք օր ժամանակ խնդրեց՝ հարցը պատգամավորների հետ քննարկելու համար:

Նախագծով առաջարկվում է ստեղծել «Նաիրիտ Գործարան» ՓԲԸ-ի գործունեությունն ուսումնասիրող, իսկ այնուհետև ընկերությունում ներդրումային պարտավորությունների մշտադիտարկում և վերա­հսկողություն իրականացնող Ազգային ժողովի ժամանակավոր հանձնաժողով՝ ՀՀ կառավարության և ընկերության ներկայացուցիչների ընդգրկմամբ: Պատգամավորներն առաջարկում են ՀՀ արդյունաբերության զարգացման պետական ծրագրի շրջանակներում «Նաիրիտ» գործարանը հայտարարել արդյունաբերական գոտի և 70 մլն դոլարին համարժեք ՀՀ դրամ կամ ավելի ներդրումային նախագծի դեպքում հինգ տարով ազատել հարկերից: