ԵՐԵՎԱՆ, 14 ԱՊՐԻԼԻ, ԱՐՄԵՆՊՐԵՍ։ Գյումրիի կենտրոնական գրադարանում ապրիլի 12-ին կայացել է հայրենադարձ երիտասարդ բանաստեղծուհու հանդիպումը Գյումրիում բնակվող ընթերցողների հետ։

Մարիաննա  Շահպարոնյանը հրատարակել է «Դեպի Հայաստան» բանաստեղծությունների ժողովածուն։ Գրքի առաքելությունն է՝ միավորել աշխարհասփյուռ հայությանը ազգային արժեքների շուրջ։

Հանդիպումն անցել է շատ ջերմ մթնոլորտում։ Գյումրեցիները մեծ ոգևորությամբ են ընդունել երիտասարդ բանաստեղծուհուն։

Միջոցառմանը ներկա էին Գյումրիի համայնքապետարանի մշակույթի և երիտասարդության հարցերի բաժնի պետի տեղակալ Էդգար Մարտիրոսյանը, դերասանուհի, թատերական ռեժիսոր, ՀԽՍՀ արվեստի վաստակավոր գործիչ Սիրանուշ Ղուկասյանը (մեծ ոգևորությամբ ասմունքել է  Մարիաննա Շահպարոնյանի բանաստեղծություններից որոշները և գովեստի խոսքեր է հղել Երևանից ժամանած երիտասարդ բանաստեղծուհու ստեղծագործություններին), գրող Գագիկ Վարդանյանը, ինչպես նաև գրադարանների վարիչներ, ընթերցողներ և ուսանողներ։ 

Հանդիպումներ են նախատեսված ընթերցողների հետ ՀՀ բոլոր մարզկենտրոններում, ինչպես նաև սփյուռքի հիմնական գաղթօջախներում։ «Շատ հպարտ եմ սկսել մարզային այցերը հենց Գյումրիից, քանի որ բոլորը գիտեն, որ այն մեր մշակութային մայրաքաղաքն է և շատ գեղեցիկ վայր է, որը, անշուշտ, գերում է յուրաքանչյուրի սիրտը»,-ասում է Մարիաննա Շահպարոնյանը։

Մարիաննա Շահպարոնյանը Գյումրիի կենտրոնական գրադարանին և դրա մասնաճյուղերին նվիրաբերեց մոտ 30 օրինակ «Դեպի Հայաստան» իր գրքից։