Երևանում՝ 11:07,   25 Մայիս 2024

Հայնան․ բացահայտելով Չինաստանի «Հավայան կղզիները»

Հայնան․ բացահայտելով Չինաստանի «Հավայան կղզիները»

ՊԵԿԻՆ, 11 ԱՊՐԻԼԻ, ԱՐՄԵՆՊՐԵՍ։ Չինաստանի ամենահարավային նահանգը՝ Հայնանը, որը հաճախ անվանում են «Չինաստանի Հավայան կղզիներ», դրախտային արևադարձային կղզի է՝ ոսկեգույն ավազե լողափերով, արմավենիներով, հինգաստղանի հյուրանոցներով, ժամանցի վայրերով և մշակութային տեսարժան վայրերով՝ դարձնելով այն երանելի հանգստի իդեալական ուղղություն։  

Պատահական չէ, որ զբոսաշրջությունը նահանգի կարևորագույն ոլորտներից է։ (Ի դեպ, Հայաստանի քաղաքացիները կարող են առանց վիզայի այցելել Չինաստան, այդ թվում և` Հայնան):

Սակայն բացի զբոսաշրջային պահանջված ուղղություն լինելուց, Հայնան կղզին նաև Չինաստանի ամենամեծ հատուկ տնտեսական գոտին է։ Այն նաև հյուրընկալում է Բոաո ասիական ֆորումը, որն ընդունված է անվանել «Ասիական Դավոս»։ Հայնանն այսօր վերափոխվում է աշխարհի ամենամեծ ազատ առևտրային նավահանգստի։

Նահանգն ունի արևադարձային մուսոնային օվկիանոսային կլիմա և առատ արևի լույս, ինչն այն իդեալական վայր է դարձնում մշակաբույսերի աճեցման համար: Ավելին, կղզում հայտնաբերված ավելի քան 4000 բույսերի շարքում մոտ 2000-ը կարող են օգտագործվել որպես դեղամիջոց, ինչը կազմում է Չինաստանի բուժիչ դեղաբույսերի բազմազանության 40%-ը և Հայնանին արդարացիորեն շնորհում է երկրի «բնական դեղամիջոցների պահեստ»-ի տիտղոսը:

Հայնանի ազատ առևտրային գոտին Չինաստանի ամենամեծ ու բաց հարթակն է, որտեղ երկրի ամենաբարենպաստ քաղաքականությունը կենտրոնացած է զրոյական մաքսատուրքերի, ցածր հարկերի դրույքաչափերի և պարզեցված հարկային համակարգի շուրջ:

Վերջին հինգ տարիներին Հայնանում վճարված օտարերկրյա ներդրումների տարեկան միջին աճը կազմել է 63,3%: 2022 թվականին Հայնանի ազատ առևտրային հաշիվներով կապիտալի հոսքը կազմել է ավելի քան 35 միլիարդ դոլար։ Միայն վերջին հինգ տարում Հայնանում շուկայի մասնակիցների աճը գերազանցել է նահանգի հիմնադրմանը հաջորդած 30 տարիներին գրանցած աճի ցուցանիշին: Հայնանի ազատ առևտրային նավահանգստում հատկապես սրընթաց աճ են գրանցում ապագային ուղղված արդյունաբերական երեք ուղղությունները՝ «Ցամաքային» (սերմնաբուծություն), «Ծովային» (ստորջրյա գիտություն և տեխնոլոգիա) և «Աերոտիեզերք» (ավիատիեզերական գիտություն և տեխնոլոգիա)։

«Մենք ստեղծել ենք ազատ առևտրային նավահանգստի քաղաքականության համակարգ, որը դյուրացնում և ազատականացնում է առևտրի, ներդրումների, անդրսահմանային կապիտալի, անձնակազմի և տրանսպորտի, ինչպես նաև տվյալների անվտանգ և կանոնավոր հոսքը», - ապրիլի 11-ին Պեկինում կազմակերպված մամուլի ասուլիսի ժամանակ ասաց Հայնանի նահանգապետ Լիու Սիաոմինը։ - «2022 թվականին Հայնան կատարած այցի ժամանակ նախագահ Սի Ծինփինը վերահաստատեց Հայնանի՝ որպես չինական բնութագրերով և համաշխարհային ազդեցությամբ ազատ տնտեսական նավահանգիստ զարգացումն արագացնելու, ինչպես նաև Հայնանի ազատ տնտեսական գոտին ամբողջ աշխարհում որպես փայլուն չինական մոդել դարձնելու կարևորությունը»։

2023 թվականին Հայնանը գրանցել է աճի ամենաարագ տեմպերն ամբողջ երկրում՝ ՀՆԱ-ի 9,2% աճով։ Այժմ տեղական իշխանությունները պատրաստվում են «կղզու ամբողջ տարածքում հատուկ մաքսային գործողությունների»։ Հայնան նահանգի համախառն տարածաշրջանային արդյունքը 2023 թվականին կազմել է ավելի քան 104,3 միլիարդ ԱՄՆ դոլար։

Տեղական իշխանությունները մեծ նշանակություն են տալիս նաև շրջակա միջավայրի պաշտպանությանը, ուստի Հայնանում մաքուր էներգիայի կայանների և նոր էլեկտրոմոբիլների սեփականության համամասնությունը զգալիորեն բարձր է ազգային միջին ցուցանիշից:

2030 թվականից Հայնանը կարգելի հանածո վառելիքով մեքենաների վաճառքը։ Հայնանի զբոսաշրջային 5 ամենապահանջված ուղղություններն են մանրածախ զբոսաշրջությունը, առողջապահական և բժշկական զբոսաշրջությունը, ծովային զբոսաշրջությունը, մշակութային զբոսաշրջությունը և սպորտային զբոսաշրջությունը:

Սույն հոդվածը պատրաստվել է Չինաստանի Մամուլի հաղորդակցության միջազգային կենտրոնի (CIPCC) 2024 թվականի լրագրողական փոխանակման ծրագրի շրջանակում։


Բաժանորդագրվեք մեր ալիքին Telegram-ում






youtube

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am