Գեղարքունիքի մարզում հայտնի են «Սպորտլանդիա»-ի հանրապետական փուլի մասնակից թիմերը
ԳԱՎԱՌ, 22 ԱՊՐԻԼԻ, ԱՐՄԵՆՊՐԵՍ։ Գեղարքունիքի մարզում արդեն հայտնի են «Սպորտլանդիա»-ի հանրապետական փուլի մասնակից թիմերը։
Ինչպես «Արմենպրես»-ը տեղեկացավ Գեղարքունիքի մարզպետի աշխատակազմի ԿՄՍ վարչությունից, «Սպորտլանդիա» մարզական միջոցառումն անցկացվել է երկու տարիքային խմբերով` 1-3-րդ և 4-6-րդ դասարանցիների միջև` 4 փուլով:
Ներդպրոցական փուլն անցկացվել է 2024 թվականի փետրվար-մարտ ամիսներին, որտեղ ձևավորվել են դպրոցական հավաքական թիմերը:
Թիմի կազմում ընդգրկված էին 5 տղա և 5 աղջիկ։ Այս փուլում կազմակերպվել են առանձին-առանձին մրցումներ 1-ին, 2-րդ, 3-րդ, 4-րդ, 5-րդ և 6-րդ դասարանների աշակերտների միջև:
1-3-րդ դասարանցիների մրցումային ծրագրում եղել են՝ խաղային փոխանցումավազք, փոխանցումավազք արգելքների հաղթահարումով, փոխանցումավազք մարմնամարզական օղակներով, մրցումներ երկանիվ հեծանիվով և օլիմպիական խորհրդանիշի հավաքում վարժությունները, իսկ 4-6-րդ դասարանցիների ծրագրում երկանիվ հեծանիվով վարժության փոխարեն ընդգրկված էր խաղային փոխանցումավազք բասկետբոլի գնդակով վարժությունը:
Մարտի 20-29-ը դպրոցական թիմերը մասնակցել են համայնքային փուլի մրցումներին, որոնց ընթացքում 1-ին և 2-րդ տեղեր գրաված թիմերն իրավունք են ստացել՝ մասնակցելու մարզային փուլերի մրցումներին:
1-3-րդ դասարանների աշակերտների միջև մարզային փուլի մրցումներն անցկացվել են 2024 թվականի ապրիլի 12-ին, Մարտունու Ս. Դարբինյանի անվան N 2 հիմնական դպրոցի մարզադահլիճում:
Ծավալված պայքարի արդյունքում առաջին տեղը գրավել է Սևանի Մեսրոպ Մաշտոցի անվան N 1 հիմնական դպրոցի թիմը, երկրորդ տեղը զբաղեցրել է Ծովազարդի միջնակարգ դպրոցի թիմը, իսկ երրորդ տեղը՝ Գավառ քաղաքի Պ. Ղանդիլյանի անվան N 2 միջնակարգ դպրոցի թիմը:
4-6-րդ դասարանների աշակերտների միջև մարզային փուլի մրցումներն անցկացվել են ապրիլի 19-ին, Գավառի Գրիշա Վահանի Ափրոյանի անվան մարզադպրոցի մարզադահլիճում, ինչի արդյունքում հաղթող է ճանաչվել Մարտունու Մ. Մելիք-Շահումյանցի անվան N 1 հիմնական դպրոցի թիմը: 2-րդ տեղում էր Գավառ քաղաքի Պ. Ղանդիլյանի անվան N 2 միջնակարգ դպրոցի թիմը, իսկ երրորդ հորիզոնականը հավասար միավորներով կիսել են Սևանի Վ. Կարապետյանի անվան N 3 հիմնական և Ծովազարդի միջնակարգ դպրոցների թիմերը: Մարզային փուլում երկու տարիքային խմբերում 1-ին, 2-րդ և 3-րդ տեղեր գրաված թիմերին ԿԳՄՍ նախարարության կողմից հանձնվել են հավաստագրեր և գավաթներ:
Այսպիսով, սպորտլանդիայի հանրապետական փուլի մրցումներում Գեղարքունիքի մարզը 1-3-րդ դասարանցիների մրցապայքարում կներկայացնեն Սևանի Մեսրոպ Մաշտոցի անվան N 1 հիմնական, իսկ 4-6-րդ դասարանցիների մրցապայքարում՝ Մարտունու Մ. Մելիք-Շահումյանցի անվան N 1 հիմնական դպրոցների թիմերը:
Խոսրով Խլղաթյան
Բաժանորդագրվեք մեր ալիքին Telegram-ում