ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Հյուսիսային Մակեդոնիայում նախագահական ընտրությունների առաջին փուլի նախնական արդյունքներով՝ վստահ առավելությամբ հաղթում է «Մակեդոնիայի ներքին հեղափոխական կազմակերպություն-Հանուն Մակեդոնիայի ազգային միասնության դեմոկրատական ​​կուսակցություն» խոշորագույն ընդդիմադիր կուսակցության թեկնածու Գորդանա Սիլյանովսկա Դավկովան։

«Արմենպրես»-ի փոխանցմամբ՝ ՏԱՍՍ-ը հաղորդում է, որ քվեաթերթիկների ավելի քան 82 %-ի հաշվարկներով՝ նա հավաքում է ձայների 40,05 %-ը (290 259 ձայն)։

Նախնական տվյալներով՝գործող նախագահ Ստևո Պենդարովսկին, որին աջակցում է Մակեդոնիայի սոցիալ-դեմոկրատական ​​միությունը, զգալիորեն հետ է մնում՝ ձայների 19,55 %-ով (141 706 ձայն): Երրորդ տեղում է արտաքին գործերի նախարար, ալբանական փոքրամասնության ներկայացուցիչ, ձախ կենտրոնամետ «Ժողովրդավարական միություն հանուն ինտեգրման» կուսակցությունից առաջադրված Բույար Օսմանին՝ ձայների 14,15 %-ով։

Թեկնածուներից ոչ մեկը չի հավաքել ձայների 50 %-ից ավելին, և մայիսի 8-ին կայանալիք նախագահական ընտրությունների երկրորդ փուլում հանրապետության քաղաքացիներն ընտրություն են կատարելու Գորդանա Սիլյանովսկա Դավկովայի և Ստևո Պենդարովսկիի միջև։

Հյուսիսային Մակեդոնիայում նախագահական ընտրությունները կայացել են ապրիլի 24-ին: Օրվա ընթացքում ընտրական իրավունքից կարող էր օգտվել հանրապետության շուրջ 1,81 մլն քաղաքացի։ Ըստ Պետական ​​ընտրական հանձնաժողովի՝ ժամը 18:30-ի դրությամբ ընտրություններին մասնակցությունը կազմել է 48,38 %: