ԵՐԵՎԱՆ, 14 ՄԱՅԻՍԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանն ընդգծում է, որ Հայաստանում տեղի ունեցած ոչ բռնի, թավշյա հեղափոխությունից հետո ժողովրդավարությունը Հայաստանում իսկապես իրականություն է դարձել։

«Արմենպրես»-ի հաղորդմամբ՝ վարչապետ Նիկոլ Փաշինյանն այս մասին ասել է՝ ելույթ ունենալով «Կոպենհագենի ժողովրդավարության գագաթնաժողովին» և մասնակցելով  «Առաջնագծից․ Հայաստանի ժողովրդավարության պաշտպանությունը» (“From the frontline: Armenia’s defence of democracy”) թեմայով քննարկմանը:

Վարչապետն իր ելույթում լավ նորություն համարեց այն, որ ժողովրդավարությունն իսկապես իրականություն է դարձել Հայաստանում:

«Բայց ի՞նչ է փոխվել Հայաստանի քաղաքացիների համար իրական ժողովրդավարությամբ։ Մինչև 2018 թվականի թավշյա հեղափոխությունը մեր երկրում զանգվածային ընտրակեղծիքներն էին ընտրությունների սովորական ուղեկիցը։

Քաղաքացիների շրջանում վստահություն չկար, որ նրանց համար խորհրդարան և կառավարություն ընտրելու և ձևավորելու իրական հնարավորություն կա։ Այժմ իրավիճակը բոլորովին այլ է: Քաղաքացիները գիտեն, որ իրենք բավականաչափ հզոր են որոշելու համար»,-ասաց վարչապետը՝ հավելելով, որ 2018 թվականին Հայաստանում տեղի ունեցած թավշյա հեղափոխությունից հետո Հայաստանում անցկացված երկու համընդհանուր ընտրությունները թե՛ հայ հասարակության, թե՛ միջազգային հանրության կողմից ճանաչվել են ժողովրդավարական, ազատ և մրցակցային։

Նա նշեց, որ Հայաստանը հսկայական առաջընթաց է գրանցել ժողովրդավարական ինստիտուտների ամրապնդման գործում, ինչը շատ լավ արտացոլված է տարբեր հեղինակավոր միջազգային կառույցների ժողովրդավարության ցուցանիշներում:

«Այժմ մենք 43-րդն ենք «Լրագրողներ առանց սահմանների» խոսքի ազատության ինդեքսում՝ 2017 թվականի 79-րդ տեղի համեմատ:

Freedom House-ի կողմից 2017 թվականին դասակարգված լինելով որպես մասամբ ազատ ինտերնետ ունեցող երկիր՝ այժմ մենք վայելում ենք ազատ ինտերնետ ունեցող երկրի կարգավիճակը: «Թրանսփարենսի Ինթերնեշնլ» կոռուպցիայի ընկալման ինդեքսում Հայաստանն այժմ 62-րդ տեղում է՝ 2017 թվականի 107-րդի փոխարեն: Economist Intelligence Unit Democracy Index-ում այժմ մենք 84-րդն ենք՝ 2017-ի 111-ի համեմատ»,- ընդգծեց Նիկոլ Փաշինյանը։