ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Ավստրալիայի Հայ դատի հանձնախմբի բողոքի հիման վրա Ավստրալիայի թուրքական լոբբիստական ալյանսը (ATTA) դուրս է բերվել Ավստրալիայի մարդու իրավունքների հանձնաժողովի հակառասիստական արշավի մասնակիցների կազմից, որն ընթանում է «Ռասիզմ. այն դադարում է ինձ հետ» խորագրով:

Ինչպես «Արմենպրես»-ին տեղեկացրին Ավստրալիայի Հայ դատի հանձնախմբից, ATTA-ի գործունեությունը հիմնականում ուղղված է Հայոց ցեղասպանության հարցում թուրքական ժխտողական մոտեցումների տարածմանը: Նրանք լոբբիստական գործունեություն են տանում ինչպես Ավստրալիայի դաշնային խորհրդարանում, այնպես էլ առանձին նահանգների օրենսդիր մարմիններում:

Կազմակերպությունը ներառվել էր Ավստրալիայի մարդու իրավունքների հանձնաժողովի հակառասիստական արշավում որպես գործընկեր, սակայն Ավստրալիայի Հայ դատի հանձնախմբի կողմից բողոքի ներկայացումից հետո, որն ուղեկցվել է նաև այդ կազմակերպության ժխտողական մոտեցումները հիմնավորող հրապարակումներով ու փաստաթղթերով, ATTA-ն դուրս է բերվել արշավի գործընկերների կազմից: