Սերգեյ Ավետիսյանը զբոսաշրջության զարգացման տեսանկյունից կարևորում է թուրքական «Պեգասուս»-ի մուտքը Հայաստան
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Թուրքական «Պեգասուս» բյուջետային ավիաընկերության մուտքը Հայաստան կարևոր նշանակությունի ունի երկրում զբոսաշրջության զարգացման տեսանկյունից: Ապրիլի 27-ին լրագրողների հետ հանդիպմանն այս մասին ասաց ՀՀ կառավարությանն առընթեր քաղաքացիական ավիացայի գլխավոր վարչության պետ Սերգեյ Ավետիսյանը: «Ես կարծում եմ, որ «Պեգասուս» ավիաընկերության մուտքը մեր շուկա Հայաստանը տարածաշրջանում կպահի մրցակցային դիրքերում: Մեր քաղաքացիների մեծ մասը, ովքեր ճամփորդում են Թբիլիսիից, հիմնականում օգտվում են կամ «Պեգասուս»-ի կամ Turkish Airlines-ի ծառայություններից»,- «Արմենպրես»-ի հաղորդմամբ` նշեց Ավետիսյանը:
Նա հավելեց, որ ինքն առաջին հերթին այդ հարցին նայում է Հայաստանում զբոսաշրջությունը զարգացնելու տեսանկյունից: «Քանի որ «Պեգասուս»-ը համարվում է եվրոպական ամենահայտնի «լոուքոստերներից» մեկը, որի աշխարհագրական ծածկույթը շատ մեծ է: Սա շատ լավ հնարավորություն է ընձեռում օտարերկրացներին Հայաստանի Հանրապետություն այցելելու համար»,- եզրափակեց Սերգեյ Ավետիսյանը:
Հունիսի 1-ից շաբաթը 3 անգամ Ստամբուլից «Զվարթնոց» միջազգային օդանավակայան թռիչքներ կիրականացնի «Պեգասուս» ավիաընկերությունը: Թռիչքները կիրականացվեն երկուշաբթի, չորեքշաբթի և ուրբաթ օրերին: Ավիաընկերությունը Ստամբուլից միջազգային թռիչքներ է իրականացնում գրեթե բոլոր եվրոպական երկրներ: «Պեգասուս»-ը տարածաշրջանի ամենաակտիվ «լոուքոստերներից» մեկն է: Այն հիմնականում աշխատում է Ստամբուլի Սաբիհա Գյոկչեն օդանավակայանի հետ:
Բաժանորդագրվեք մեր ալիքին Telegram-ում