ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: ԱՄՆ Կալիֆորնիա նահանգի սենատոր Էնթոնի Պորտանտինոն հայտարարել է նահանգի սենատի կրթության բյուջետային ենթահանձնաժողով 16 մլն ԱՄՆ դոլար ավելացնելու մասին, որով կֆինանսավորվի պատմասոցիալական գիտությունների կրթական ծրագիրը, որը ներառելու է կրթական ծրագրեր Հայոց ցեղասպանության ու պատմական այլ կարևոր դեպքերի վերաբերյալ: Ինչպես հաղորդում է «Արմենպրես»-ը, այս մասին հայտնում է Հայ դատի ԱՄՆ հանձնախումբը:

«Ես հպարտ եմ, որ օգնել եմ շարունակել ջանքերը՝ ապահովելու ճշգրիտ ու համապատասխան կրթություն Կալիֆորնիայի ուսանողների համար: Ես հատկապես ուրախ եմ, որ այս բյուջետային հատկացումները ներառում են Հայոց ցեղասպանության մասին կրթական չափորոշիչների կիրառում: Հայոց ցեղասպանության մասին պատմական տեղեկությունները համաշխարհային պատմության ողբերգական ու կարևոր մասն են, որոնք շարունակում են առերեսվել ժխտման ու կազմակերպված ընդդիմության հետ: Մեր դպրոցներում դրանց ուսուցումը տեղին է»,- ասել է Պորտանտինոն:

Նախորդ տարի Կալիֆորնիայի սենատի կրթական հանձնաժողովը ընդունել էր նոր պատմասոցիալական գիտության կրթական ծրագիր, որն ուղեցույցներ էր պարունակում հանրային դպրոցների ուսուցիչների համար: Դա նպաստել է Հայոց ցեղասպանության մասին տեղեկացվածության մակարդակի զգալիորեն բարձրացմանը: