ՊԵԿԻՆ, 3 ՄԱՅԻՍԻ, ԱՐՄԵՆՊՐԵՍ։ Չինաստանի հյուսիս-արևմուտքում գտնվող Սինծիանի Ույղուրական ինքնավար շրջանը, որը երկրի ադմինիստրատիվ ամենամեծ շրջանն է, վերջին տարիներին տնտեսապես արագ զարգանում է, քանի որ այն համարվում է կամուրջ դեպի Կենտրոնական Ասիա և Եվրոպա, ինչպես նաև կարևոր հանգույց Գոտի և ճանապարհ համագործակցության մեջ:

Բազմէթնիկ այս տարածաշրջանը սահմաններ ունի ութ երկրի՝ Աֆղանստանի, Ղազախստանի, Ղրղզստանի, Մոնղոլիայի, Պակիստանի, Ռուսաստանի, Տաջիկստանի և Հնդկաստանի հետ։

2023 թվականին տարածաշրջանի ՀՆԱ-ն կազմել է 1,91 տրիլիոն յուան, իսկ գյուղատնտեսության, անտառային տնտեսության, անասնաբուծության և ձկնաբուծության արտադրանքը հասել է 564,8 միլիարդ յուանի: Սինծիանն ավանդաբար հանդիսացել է գյուղատնտեսական շրջան, սակայն այն հարուստ է նաև օգտակար հանածոներով ու նավթով։ Տարածաշրջանում բամբակի արդյունաբերությունը ամենախոշոր ուղղություններից է։  

Տարածաշրջանի արագ աճի պատճառը Սինծիան արտադրական և շինարարական կորպուսն (XPCC) է։ Շրջանի կառավարումն իրականացվում է կորպուսի և Սինծիանի Ույղուրական ինքնավար շրջանի ադմինիստրացիայի կողմից զուգահեռ։

Սինծիան արտադրական և շինարարական կորպուսը եզակի և բարդ պատմություն ունի․ այն ստեղծվել է 1954 թվականին՝ սահմանամերձ շրջանները գլխավորապես գյուղատնտեսության և արդյունաբերության միջոցով պաշտպանելու նպատակով։ Այլ կերպ ասած՝ զինվորները «հանեցին իրենց համազգեստը» և սկսեցին զբաղվել հողագործությամբ։ Կորպուսի աշխատանքը կազմակերպված է ռազմական ոճով՝ կառույցում ունենալով ստորաբաժանումներ և գնդեր, սակայն այն իրականում ռազմական կազմակերպություն չէ, իսկ անվանումները, ինչպես բացատրեցին պաշտոնյաները, պահպանվել են միայն իբրև հարգանքի տուրք դրա պատմությանը։ Կորպուսի կենտրոնակայանը գտնվում է Ուրումչիում՝ Սինծիանի մայրաքաղաքում, այն նաև գործում է բազմաթիվ այլ քաղաքներում, ինչպիսիք են Արալը և Շիհեցզին։

Այն տարածաշրջանային և նախարարական մակարդակի հատուկ շրջան է և համարվում է նահանգի անբաժան մասը։

«Սինծիան արտադրական և շինարարական կորպուսը Սինծիանի Ույղուրական ինքնավար շրջանի կարևոր մասն է։ Ներկայում կորպուսը բաղկացած է 14 ստորաբաժանումից, 12 քաղաքից, 179 ֆերմերային տնտեսությունից, 3 համալսարանից և 14 առևտրային ընկերությունից»,- լրագրողներին ասաց կորպուսի արտաքին գործերի գրասենյակի տնօրեն Ջյանգ Չինշանը։

2023 թվականին Կորպուսի մասնաբաժինը տարածաշրջանի ընդհանուր ՀՆԱ-ում կազմել է 369 միլիարդ յուան:

«Կորպուսն անընդհատ մեծացնում է աշխարհի առաջ իր թափանցիկության աստիճանը և ակտիվորեն մասնակցում է Մետաքսի ճանապարհի տնտեսական գոտու հիմնական հատվածի կառուցմանը», - նշեց  Ջյանգ Չինշանը:

Սինծիան արտադրական և շինարարական կորպուսն անգամ մշակել է գյուղատնտեսության համար ջրի խնայողությամբ ոռոգման սեփական համակարգը, որը խնայում է 1800 խմ ջուր մեկ հեկտարի համար:

2022 թվականին Չինաստանի նախագահ Սի Ծինփինը, Ուրումչիի միջազգային ցամաքային նավահանգիստ կատարած այցի ժամանակ հայտարարեց, որ «Գոտի և ճանապարհ համագործակցության զարգացման հետ մեկտեղ Սինծիանն այլևս դադարում է լինել հեռավոր անկյուն, այն վերածվում է առանցքային շրջանի և հանգույցի»։

Տարածաշրջանում ակտիվորեն զարգանում է նաև առողջապահությունը։ Բժիշկներն օգտագործում են 5G-ով գործող ռոբոտային վիրաբուժության տեխնոլոգիաները և հեռահար ախտորոշման մեթոդները Sir Run Run Shaw բժշկական կենտրոնի հետ կապ ունեցող Արալի հիվանդանոցում՝ արտակարգ պատահարների ժամանակ բուժելու հեռավոր շրջանների հիվանդներին։ 

Իսկ Շիհեցզիի համալսարանը վկայությունն է կրթության հանդեպ կորպուսի հատկացրած ուշադրության։ Հանրային համալսարանն առաջարկում է մասնագիտությունների մեծ բազմազանություն, այդ թվում և գյուղատնտեսություն, բժշկություն, ինժեներիա, էկոնոմիկա և առևտուր, գրականություն և արվեստ։

Համալսարանը նաև ակտիվորեն համագործակցում է արտերկրյա գործընկերների հետ, շատ ակադեմիկոսներ և ուսանողներ այնտեղ այցելում են փոխանակման ծրագրերի ու վերապատրաստումների շրջանակում։

Նահանգի կարևոր արդյունաբերական ուղղություններից է նաև խաղողագործությունը։

Չինաստանի ամենախոշոր գինեգործական ընկերությանը՝  Չանյուին է պատկանում Շիհեցզի քաղաքում գտնվող գինեգործարանը, որն ընկերության առաջին գինեգործ, բելգիացի պրն․ Բալբոայի անունով կոչվում է Chateau Changyu Baron Balboa։

Գինու գործարանն ունի նաև տարածաշրջանի ամենամեծ գինու մառանը։

Տարածաշրջանի մեկ այլ գրավիչ զբոսաշրջային ուղղություն է Տակլա Մական անապատը, որի այցելուները կարող են ադրենալինի նոր չափաբաժին ստանալ ամենագնացներ վարելով կամ ուղտ նստելով։

Ի դեպ, Տակլա Մական անապատն աշխարհի ամենամեծ ավազային անապատներից է։ 

Սույն հոդվածը պատրաստվել է Չինաստանի Մամուլի հաղորդակցության միջազգային կենտրոնի (CIPCC) 2024 թվականի լրագրողական փոխանակման ծրագրի շրջանակում։