ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Դատարանը բավարարել է «Սասնա ծռեր» խմբի անդամներ Գագիկ Եղիազարյանի և Արամ Հակոբյանի նկատմամբ կալանավորումը որպես խափանման միջոց ընտրելու միջնորդությունը: Այս մասին «Արմենպրես»-ին տեղեկացրեց պաշտպան Լուսինե Հակոբյանը:

Գագիկ Եղիազարյանի և Արամ Հակոբյանի նկատմամբ մեղադրանք է առաջադրվել Քրեական օրենսգրքի 219 հոդվածի 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։

Նրանք, սակայն, իրենց առաջադրված մեղադրանքը չեն ընդունում: Փաստաբանի տեղեկացմամբ` Գագիկ Եղիազարյանն ու Արամ Հակոբյանը կալանավորվել են ու տեղափոխվել ԱԱԾ մեկուսարան:

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց, որոնց բաց են թողել մեկ շաբաթվա ընթացում, իսկ հուլիսի 27-ին կրկին պատանդ են պահել գնդի տարածք մեկնած «Շտապօգնության» բժիշկներին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը: