ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանը եւ Իսրայելը ընդլայնում են համագործակցությունը տարբեր ոլորտներում: «Արմենպրես»-ի հաղորդմամբ՝ ՀՀ ԱԺ Հայաստան-Իսրայել բարեկամական խմբի ղեկավար Արտակ Զաքարյանի եւ Իսրայելի կնեսետի փոխխոսնակ, Իսրայել-Հայաստան պատգամավորական բարեկամական խմբի ղեկավար Թալի Պլոսկովի նախաձեռնությամբ մեկնարկեց հայ-իսրայելական համագործակցության հասարակական ֆորումի ձեւավորման աշխատանքը:

Նախորդ տարի ձեւավորված գաղափարն այսօր ծառայելու է որպես հարթակ երկու երկրների գիտական, մշակութային, տեխնոլոգիական, առողջապահության, զբոսաշրջության եւ գործարար տարբեր ոլորտներում համագործակցության համար:

Իսրայելի կնեսետի փոխխոսնակ Թալի Պլոսկովն ընդգծեց, որ երկու պետություններն ունեն շատ ընդհանրություններ, եւ պետք է աշխատել փոխադարձ կապերի ամրապնդման ուղղությամբ:

«Իսրայելում կա այն, ինչ չկա Հայաստանում, եւ հակառակը` Հայաստանում կա այն, ինչ չկա Իսրայելում: Կարծում եմ՝ երկու կողմերն էլ ուրախ կլինեն համագործակցության ընդլայնման կապակցությամբ»,- նշեց Թալի Պլոսկովը:

Ֆորումն իր աշխատանքը պարբերաբար իրականացնելու է եւ՛ Հայաստանում, եւ՛ Իսրայելում: Այն ներգրավելու է երկու երկրներում շահագրգիռ անձանց՝ մշակելու եւ իրականացնելու համատեղ ծրագրեր, բիզնես ներդրումներ, տեխնոլոգիական զարգացման հնարավորություններ եւ այլն:

Ֆորումի ընթացքում ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը եւ Կնեսետի փոխխոսնակ Թալի Պլոսկովը ներկայացրեցին համագործակցության տարբեր ոլորտներում իրականացվելիք աշխատանքների համակարգող-պատասխանատուներին: Հայկական կողմից ֆորումի համանախագահն է Ազգային ռազմավարական հետազոտությունների  ինստիտուտի պետ, գեներալ-լեյտենանտ Հայկ Քոթանջյանը, իսկ Իսրայելի կողմից՝ Կնեսետի նախկին պատգամավոր, Իսրայել-Հայաստան միջխորհրդարանական  բարեկամական խմբի հիմնադիր Ալեքսանդր Ցինկերը:

ՀՀ ԱԺ պատգամավոր Խաչատուր Քոքոբելյանը նշեց, որ երկու երկրները միմյանց փոխանցելու շատ բան ունեն:

«Կարծում եմ՝ մենք պետք է աշխատենք ակտիվ ռեժիմով»,-ասաց նա:

Ֆորումի ընթացքում քննարկվեցին նաեւ այլ ոլորտներում համագործակցությանն առնչվող հարցեր՝ այդ թվում Հայաստանում հրեական համայնքի, ինչպես նաեւ Իսրայելում հայկական համայնքի ներգրավման, երկրների դիվանագիտական հարաբերություններն այլ մակարդակի բարձրացնելու՝ դեսպանատներ ունենալու վերաբերյալ:

Այդ հարցի առնչությամբ Թալի Պլոսկովը, մասնավորապես, նշեց, որ դա կախված է միմյանց հետ արդյունավետ աշխատանքից:

«Մենք պետք է ապացուցենք երկու երկրների ղեկավարներին, որ դա շատ կարեւոր է կողմերի համար»,-ընդգծեց նա: