Ինֆորմացիայի ազատության կենտրոնի կողմից ամենաբաց գերատեսչություն է ճանաչվել ՀՀ առողջապահության նախարարությունը
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Ինֆորմացիայի ազատության կենտրոնի «Ոսկե բանալի և ժանգոտ կողպեք» ամենամյա մրցանակաբաշխության ընթացքում ամենաբաց գերատեսչություն է ճանաչվել ՀՀ առողջապահության նախարարությունը: «Բաց կառավարման գործընկերություն» միջազգային նախաձեռնության շրջանակում հայաստանյան գործողությունների ծրագրի հանձնառությունները լավագույն իրականացման համար Ոսկե բանալի մրցանակ է տրվել ՀՀ կառավարության աշխատակազմի ղեկավար-նախարար Դավիթ Հարությունյանին, ով կարևորել է նախաձեռնությունը և շնորհավորել մրցանակակիրներին:
«Արմենպրես»-ի հաղորդմամբ` ՀՀ Վայոց Ձորի մարզպետարանի պաշտոնական ինտերնետային կայքը ճանաչվել է տեղեկատվության տրամադրման լավագույն ինտերնետային պաշտոնական կայք, իսկ տեղեկություն ստանալու իրավունքն ամենաակտիվ և լավագույնս օգտագործող հասարակական կազմակերպությունը «Իրավունքների պաշտպանություն առանց սահմանների» հասարակական կազմակերպությունն է: Տեղեկատվության ազատությանն առնչվող խնդիրները հետևողական լուսաբանած լրատվամիջոց է ճանաչվել «Ասպարեզ» օրաթերթը: Մրցանակաբաշխության ընթացքում «Տեղեկատվության ազատության մասին» օրենքն ամենաակտիվ օգտագործող լրագրող է ճանաչվել Սիվիլնեթի լրագրող Արման Սուլեյմանյանը, իսկ ԻԱԿ-ի 15 ամյակի հոբելյանական Հատուկ մրցանակը շնորհվել է ՀՀ պաշտպանության նախարարի մամուլի քարտուղար Արծրուն Հովհաննիսյանին:
Ինֆորմացիայի ազատության կենտրոնի 15-ամյակի կապակցությամբ ԻԱԿ-ը որոշել է Մրցանակաբաշխության բացասական մրցանակ ժանգոտ կողպեքի մրցանակակիր մարմիններին չհայտարարել: Փոխարենը փակ գործող մարմինները կընգրկվեն Կենտրոնի եռամսյակային և տարեվերջյան Սև ցուցակներում:
Բաժանորդագրվեք մեր ալիքին Telegram-ում