ԳՅՈՒՄՐԻ, 21 ՀՈՒՆՎԱՐԻ, ԱՐՄԵՆՊՐԵՍ: ️Գյումրիում հունվարի 21-ին պաշտոնապես դռները բացեց  «Հայ-ֆրանսիական հոգեբանական և սոցիալական աջակցման» կենտրոնը` «Ֆրանսիական Լույս» ասոցիացիայի  հովանու ներքո։ Ինչպես տեղեկացնում «Արմենպրես»-ը, 44-օրյա պատերազմից հետո ձևավորված ասոցիացիան տարաբնույթ ծառայություններ է մատուցում՝ բժշկա-հոգեբանականից մինչև անվճար ճաշարան՝ Արցախից բռնի տեղահանված անձանց համար։

«Մեր առաջին քայլը եղավ Ֆրանսիայից բժշկական սարքավորումներ և դեղորայք ուղարկելը, հաջորդ քայլը բժշկական խումբ Ստեփանակերտ ուղարկելն էր, իսկ դրանից հետո գրեթե ամեն ամիս այցելել ենք Հայաստան։ Մեր հիմնական ուղղվածությունը Արցախն էր։ Սկզբում որևիցե միտք չունեինք ասոցիացիա ստեղծելու, բայց հետո հասկացանք, որ անելիքներն իրականացնելու համար պետք է ասոցիացիա ստեղծել։ Պաշտոնապես «ծնվեցինք»  2021 թվականի փետրվարին՝ Ֆրանսիայում, և այսպես մեր գործունեությունը մեզ բերեց հասցրեց Գյումրի»,- ներկայացնելով կենտրոնի անցած ուղին՝ նշեց «Ֆրանսիական Լույս» ասոցիացիայի հիմնադիր և նախագահ, բժիշկ  Լևոն Խաչատրյանը՝ վստահեցնելով՝ հետայսու ևս կլինեն  կարիքավորների կողքին։

Իր օրհնությունը և ողջույները հղելով ներկաներին՝ Ֆրանսիայի հայոց թեմի առաջնորդ Հոգեշնորհ Տ․ Գրիգոր վարդապետ Խաչատրյանը հույս հատնեց, որ կենտրոնը կշարունակի աջակցել բոլոր նրանց, ովքեր դրա կարիքն իրոք զգում են։  «2020 թվականի պատերազմի օրերին  ամեն հայ՝ այդ թվում նաև Լևոն Խաչատրյանը, փորձում էր իր ուժերի ներածի չափով անել  հնարավորն ու անհնարինը, որ պտուղ տվեց,  և  այդ պտուղներից մեկը այս կազմակերպությունն է։ Եվ եթե նպատակ բարի է, ուրեմն այս կազմակերպությունը երկար ճանապարհ է անցնելու։ Մի խնդրանք ունեմ միայն այն հոգեբաններին, ովքեր աշխատելու են այստեղ՝ ձեր գործի մեջ նաև «խառնեք Աստծո մատը» և կտեսնեք, որ ավելի կհաջողեք»,- նշեց Տ․ Գրիգոր վարդապետ Խաչատրյանը։

Առաջիկայում կենտրոնը նպատակ ունի իրականացնելու նաև VR-թերապիա՝ դառնալով Հայաստանում այդպիսի երկրորդ  կառույցը։ 

«Հերոսների վերականգնողական քաղաք» կենտրոնի հիմնադիր Սուրեն Արեենցը ևս հաստատեց՝ «Ֆրանսիական Լույս»-ը՝ հանձինս ասոցիացիայի նախագահ Լևոն Խաչատրյանի, այն քիչ կազմակերպություններից էր, որ Հայաստան է եկել իրական գործ անելու։ «Բժիշկ Խաչատրյանը նաև այն մարդկանցից էր, որ, բացի ահռելի  ֆիզիկական աջակցությունից, շատ արագ հասկացավ, որ հոգեբանական բուժումների առկայությունը կա, և ուրախ ենք, որ այն սարքավորումը, որը կա Երևանում կլինի և Գյումրիում՝ օգնելով հոգեբաններին ավելի գերժամանակակից ախտորոշում անել»։

Նորաբաց կենտրոնի գործունեությունը ողջունեցին և բարի երթ մաղթեցին նաև հոգեբույժներ, հոգեբաններ, տեղական ինքնակառավարման մարմինների ներկայացուցիչներ։

Արմենուհի Մխոյան