ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Հայաստանի պատմության թանգարանը  քաղաքական գործիչ, գրող, ՀՀ պաշտպանության առաջին նախարար և ՀՀ վարչապետ Վազգեն Սարգսյանի 65-ամյակը տոնեց նրան նվիրված ցուցահանդեսի բացումով: 

«Արմենպրես»-ի հաղորդմամբ՝ ցուցադրությանը ներկայացված են  Վազգեն Սարգսյանի ձեռագրերը, անձնական իրերը, հուշանվերներն ու շքանշանները։ Ցուցահանդեսը կազմակերպվել  է Վազգեն Սարգսյանի տուն-թանգարանի հետ համատեղ։

«Վազգեն Սարգսյանը մարդ էր, ում կյանքը նվիրում է եղել հայրենիքին, որը պետք է միշտ ուսանելի և օրինակելի դառնա նաև մեր թանգարան մուտք գործող հատկապես կրտսեր սերնդի համար: Այսօր այստեղ են նրա ընտանիքի անդամները, ընկերները, որոնց  հետ ևս մեկ անգամ կարժևորենք նորագույն շրջանի ամենակարևոր  քաղաքական և պետական գործիչներից մեկին»,- ասաց Հայաստանի պատմության թանգարանի տնօրեն Դավիթ Պողոսյանն ու հավելեց՝ Սարգսյանին նվիրված ցուցադրության բացումն իրենց համար մեծ պատիվ է: 

Նա ընդգծեց՝ հատկանշական է, որ դեռ 2023 թվականից Վազգեն Սարգսյանի տուն-թանգարանի և ընտանիքի հետ համագործակցության արդյունքում պատմության թանգարանի նորագույն շրջանի հավաքածուները համալրվեցին սպարապետի անձնական որոշ իրերով: Ըստ Պողոսյանի՝ նմուշները կօգնեն թանգարանում ներկայացնել նորագույն շրջանի կարևոր պատմական իրադարձությունները:

Վազգեն Սարգսյանի եղբայր Արամ Սարգսյանը, շնորհակալություն հայտնելով պատմության թանգարանին նման նախաձեռնությունը կյանքի կոչելու համար, ընդգծեց, որ Վազգեն Սարգսյանը կա Հայաստանի հազարամյա պատմության մեջ և շատ կարևոր է, որ նա տեղ ունի նաև Հայաստանի պատմության թանգարանում:

«Վազգեն Սարգսյանն իր տեղն ունի նաև հայ ժողովրդի սրտում: Նա անմիջական մարդ էր, ամեն ինչ նախապես ծրագրում էր, նա բազմակողմանի զարգացած մարդ էր՝ սկսած սպորտից մինչև մշակույթի ցանկացած ոլորտ:  Վազգենը շատ լավ օրինակ է սերունդներ դաստիարակելու համար»,- եզրափակեց  Արամ Սարգսյանը: