ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ։ Իսրայելը մտահոգություն է հայտնել այն տեղեկությունների առնչությամբ, որ Միջազգային քրեական դատարանը կարող է երկրի կառավարության բարձրաստիճան պաշտոնյաներին ձերբակալելու հրաման տալ՝ կապված Գազայի հատվածում ընթացող ռազմական գործողությունների հետ։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։

ՄՔԴ-ն, որը կարող է անձանց մեղադրել ռազմական հանցագործությունների, մարդկության դեմ հանցագործությունների և ցեղասպանության մեջ, հետաքննում է պաղեստինյան ՀԱՄԱՍ արմատական շարժման հոկտեմբերի 7-ի հարձակումն Իսրայելի վրա, որի հետևանքով 1200 մարդ է զոհվել, և Իսրայելի ավերիչ ռազմական գործողությունները Գազայի հատվածում, որի զոհերի թիվը գերազանցել է 34 400-ը։

Իսրայելի լրատվամիջոցներում օրերս տարածվել էին տեղեկություններ, որ ՄՔԴ-ն կարող է շուտով երկրի բարձրաստիճան պաշտոնյաների ձերբակալման հրամաններ տալ Գազայի հատվածում միջազգային մարդասիրական օրենքի հնարավոր խախտումների համար։ Երկրի արտգործնախարար Իսրայել Կացը ապրիլի 28-ին ՄՔԴ-ին նման որոշում կայացնելուց զերծ մնալու կոչ է արել։

Ավելի վաղ Նեթանյահուն էր հայտարարել, որ ՄՔԴ-ի նման որոշումը չի ազդի Իսրայելի գործողությունների վրա, սակայն «վտանգավոր նախադեպ կդառնա»։

Ըստ լրատվամիջոցներում տարածված տեղեկությունների՝ ՄՔԴ-ն նաև դիտարկում է ՀԱՄԱՍ-ի ղեկավարներին ձերբակալելու հրամաններ տալու հարցը։

Իր հերթին Հաագայում Le Monde պարբերականի աղբյուրը հաստատել է, որ շուտով Իսրայելի բարձրաստիճան պաշտոնյաներին ձերբակալելու հրամանը կարող է ընդունվել, սակայն նա չի նշել ներգրավված անձանց անունները։

Ըստ The New York Times-ի աղբյուրների՝ Իսրայելի ղեկավարներից մի քանիսը մտավախություն են հայտնել, որ Նեթանյահուն նույնպես կարող է լինել այդ ցանկում։ Իսրայելական ԶԼՄ-ները շոշափել են նաև պաշտպանության նախարար Յոավ Գալանտի և Գլխավոր շտաբի պետ Հերզի Հալևիի անունները։