ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: ՀՀ ԱԳ նախարարի տեղակալ Արմեն Պապիկյանին ապրիլի 27-ին իր հավատարմագրերի պատճենը հանձնեց ՀՀ-ում Էկվադորի նորանշանակ դեսպան Խուլիո Սեսար Պրադո Էսպինոսան (նստավայրը՝ Մոսկվա):Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:

Շնորհավորելով դեսպանին՝ ԱԳ փոխնախարարը հույս հայտնեց, որ նոր դեսպանի նշանակումով մեր երկրների հարաբերություններում նոր էջ կբացվի: Փոխնախարար Պապիկյանը խորհրդանշական համարեց, որ Էկվադորի երկրորդ դեսպանը Հայաստանում հավատարմագրվում է Հայաստանի և Էկվադորի միջև դիվանագիտական հարաբերությունների հաստատման 20-րդ տարում:

ԱԳ փոխնախարարն ու Էկվադորի դեսպանը համակարծիք էին, որ չնայած աշխարհագրական հեռավորությանը՝ Հայաստանն ու Էկվադորն ունեն տարբեր ոլորտներում արդյունավետ համագործակցություն ծավալելու բոլոր նախադրյալները:

Հանդիպման ընթացքում կողմերն անդրադարձան նաև միջազգային կազմակերպությունների շրջանակներում, ինչպես նաև առևտրատնտեսական, մշակութային, կրթական ոլորտներում համագործակցության հեռանկարներին, կարևորեցին իրավապայմանագրային դաշտի ընդլայնումը: