Գյումրիում կայացավ «Բոհեմ» ներկայացման առաջնախաղը
ԳՅՈՒՄՐԻ, 28 ԱՊՐԻԼԻ, ԱՐՄԵՆՊՐԵՍ: Գյումրու դրամատիկականի փոքր թատրոնում կայացավ «Բոհեմ» ներկայացման առաջնախաղը: Ինչպես տեղեկացնում է «Արմենպրես»-ը, Գյումրու դրամատիկական թատրոնն առաջին անգամ է անդրադառնում փաստագրական ժանրին: Ներկայացումը բեմադրել է երիտասարդ ռեժիսոր Տաթև Ժաքյանը։
Թատրոնի տնօրեն և գեղարվեստական ղեկավար Լյուդվիգ Հարությունյանն «Արմենպրես»-ի հետ զրույցում նշում է՝ թատրոնը հանդիսատեսի դատին է ներկայացնում աշխարհ նվաճած 4 կանանց՝ Էդիթ Պիաֆ, Կոկո Շանել, Մարինա Ցվետաևա, Ֆրիդա Կալո․ նրանք նվաճեցին աշխարհը, բայց չգտան իրենց երջանկությունը։ Տարբեր ճակատագրերով, տարբեր ժամանակներում ու տարբեր երկրներում ապրած այս կանանց միավորում է մեկ բան՝ չորսն էլ բոհեմական կյանք են ունեցել, բայց նաև զրկանքներ ու հիասթափություններ։
«Առաջին անգամ ներկայացման երեք օրերի տոմսերը սպառվել են»,-նշեց Լյուդվիգ Հարությունյանը՝խոստանալով որ ներկայացումը կդառնա այցեքարտային ներկայացում թատրոնի համար:
Պիեսի հեղինակը երիտասարդ դրամատուրգ Մարիա Ակոպովան է:
Արմենուհի Մխոյան
Բաժանորդագրվեք մեր ալիքին Telegram-ում