ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Թուրքիայում հունվարին տարեկան գնաճը կազմել է 64,86 տոկոս, իսկ տնտեսական աճը՝ 6,7 տոկոս:

Ինչպես հաղորդում է «Արմենպրես»-ը, տվյալները հայտնել է Թուրքիայի ազգային վիճակագրական ինստիտուտը:

«Փետրվարից սկսած՝ մենք ակնկալում ենք, որ ամսական գնաճը զգալիորեն կնվազի և կգնա մեր կանխատեսմանը համահունչ ճանապարհով: Տարվա երկրորդ կիսամյակում կտեսնենք տարեկան գնաճի զգալի անկում: Գների կայունության ապահովումը մեր առաջնահերթ խնդիրն է»,- X-ում (նախկինում՝ Twitter)  գրել է Թուրքիայի ֆինանսների նախարար Մեհմեթ Շիմշեքը:

Ի հակադրություն Թուրքիայի վիճակագրական ինստիտուտի տվյալների,  մի խումբ անկախ տնտեսագետներ և հետազոտական ընկերություններ հայտնել են, որ հունվարին Թուրքիայում գնաճը տարեկան կտրվածքով կազմել է 129,11 տոկոս, իսկ  դեկտեմբերին գնահատվել է 127,2 տոկոս:

2023 թվականի սեպտեմբերին Թուրքիայի իշխանությունները ներկայացրել էին միջնաժամկետ տնտեսական ծրագիր։

Դրանում պարունակվող կանխատեսումների համաձայն՝ երեք տարվա ընթացքում գնաճը երկրում 65%-ից նվազելու է  8,5%-ի։

 2024 թվականին գնաճի թիրախը սահմանվել է 33 տոկոս, իսկ 2025 թվականի համար՝ 15,2 տոկոս, իսկ 2026 թվականին այն պետք է իջնի մինչև 8,5 տոկոսի:

Նախատեսվում է, որ մինչև 2026 թվականի վերջը տնտեսական աճը կկազմի 5 տոկոս։