ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր տարատեսակ ցանկերից ընտրեք գրքեր և սկսեք ընթերցել: Այս շաբաթ «Արմենպրես»-ը դարձյալ առանձնացրել է նոր հրատարակված երկու ուշագրավ գիրք` երկու խորագրի ներքո:

Համաշխարհային գրականություն

Վիրջինիա Վուլֆ, «Սեփական սենյակը»

Վիրջինիա Վուլֆի այս ընդարձակ էսսեն առաջին անգամ տպագրվել է 1929-ին: Այն գրվել է դասախոսությունների հիման վրա, սակայն գեղարվեստորեն բացահայտում է կին և գրականություն առնչությունները՝ կնոջը դիտարկելով և՛ որպես հեղինակ, և՛ որպես կերպար: Ստեղծագործությունը համարվում է ֆեմինիստական. այստեղ կարևորվում է կնոջ դերը տղամարդկանցով գերիշխող գրականության ավանդույթների համապատկերում: Անգլերենից թարգմանել է Մանիկ Եգանյանը, խմբագիրն է Աշոտ Գաբրիելյանը: Գիրքը հրատարակել է «Դարակ»-ը:

Դասական ստեղծագործություններ

Ուիլյամ Շեքսպիր , «Լիր արքա»

Շեքսպիրի «Լիր արքա»-ի այս հրատարակությունն ընդգրկում է ողբերգության նոր թարգմանություն անգլերեն բնագրից, գիտական մանրակրկիտ ծանոթագրություններ ու ընդարձակ առաջաբան, որտեղ քննարկվում են երկի աղբյուրներին, գրության ժամանակին, առաջին տպագիր օրինակներին, բովանդակությանն առնչվող և այլ խնդիրներ: Թարգմանությունը, առաջաբանը և ծանոթագրությունները` Արամ Թոփչյանի: Խմբագիր`Գոհար Մուրադյան: Գիրքը հրատարկել է «Զանգակ»-ը:

«Նոր գիրք»-ը ներկայացրեց Ռոզա Գրիգորյանը