ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ: Որոշ քաղաքական ուժեր ԿԸՀ հայտ ներկայացնելու հարցում մինչև վերջին պահը անորոշության մեջ էին: «Արմենպրես»-ի հաղորդմամբ` փետրվարի 17-ին լրագրողների հետ հանդիպման ժամանակ նշեց ԱԺ ՀՀԿ խմբակցության պատգամավոր Խոսրով Հարությունյանը:

«Նախընտրական ցուցակը և այդ ցուցակում հերթականությունը որոշ քաղաքական ուժերի համար կարևոր նշանակություն ուներ: Դա խոսում է այն մասին, որ քաղաքական ուժերը խորհրդարան մտնելու խնդիր ունեն: Իսկ ազդեցիկ կուսակցությունների համար առանձնապես լուրջ անհանգստություն չի առաջացրել ցուցակների հերթականությունը»,- ասաց պատգամավորը:

Հարությունյանի կարծիքով`  Ազգային Ժողովում ներկայացված կլինեն «Հանրապետական», «Բարգավաճ Հայաստան», «Հայկական Վերածնունդ», «Դաշնակցություն» կուսակցությունները և ՀԱԿ-ՀԺԿ և «Ելք» դաշինքները:

«Այս ընտրությունները որոշ առումներով տարբերվում է նախորդներից: Կուսակցությունների ցուցակներում տեսնում եմ մասնագիտական որակներով օժտված, փորձառու մարդկանց: Օրինակ` «Հանրապետական» կուսակցությունում սերնդափոխության որոշակի միտում կա: Կարծում եմ, ապագա խորհրդարանում ներգրավված կլինեն ավելի պրոֆեսիոնալ մարդիկ»,- ընդգծեց Հարությունյանը:

Հայաստանի խորհրդարանի առաջիկա ընտրություններին մասնակցելու հայտ է ներկայացրել 9 քաղաքական ուժ:

Ընտրություններին մասնակցելու համար առաջադրման փաստաթղթեր Կենտրոնական ընտրական հանձնաժողով ներկայացրել են Հայաստանի Հանրապետական կուսակցությունը, Դաշնակցությունը, «Հայկական վերածնունդ»-ը, «Ազատ դեմոկրատներ»-ը և Հայաստանի կոմունիստական կուսակցությունը:

Կենտրոնական ընտրական հանձնաժողով առաջադրման փաստաթղթեր են ներկայացրել «Ծառուկյան», «Ելք», ՀԱԿ-ՀԺԿ, «Օհանյան-Րաֆֆի-Օսկանյան» դաշինքները:

Կենտրոնական ընտրական հանձնաժողովը կուսակցությունների և կուսակցությունների դաշինքների գրանցման գործընթացը կիրականացնի փետրվարի 16-26-ը:

Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Նախընտրական քարոզարշավը կմեկնարկի մարտի 5-ին: