Արարատի մարզում կստեղծվի «Երեխաների քաղաք» ստեղծարար կենտրոն
ԳՅՈՒՄՐԻ, 19 ՀՈՒՆԻՍԻ, ԱՐՄԵՆՊՐԵՍ: «Հայկական Կարիտաս» բարեսիրական հասարակական կազմակերպությունն Արարատի մարզում նախատեսում է իրականացնել «Երեխաների քաղաք» ստեղծարար կենտրոն ծրագիրը: Ծրագրի իրականացման համար նվիրաբերվել են Արարատի մարզի Շահումյան և Տափերական համայնքների վարչական տարածքներում գտնվող հողամասեր:
«Արմենպրես»-ի հաղորդմամբ՝ ՀՀ կառավարությունը 2021 թվականի հունիսի 17-ի նիստում հաստատել է այդ նպատակով «Համայնքային սեփականություն հանդիսացող հողամասերը նվիրաբերությամբ տրամադրելուն համաձայնություն տալու մասին» որոշումը:
ՀՀ փոխվարչապետի համապատասխան որոշմամբ՝ կազմակերպության կողմից 20 մլն ԱՄՆ դոլարին համարժեք դրամ արժողությամբ իրականացվող «Երեխաների քաղաք»-ստեղծարար կենտրոն ծրագիրը որակվել է որպես բարեգործական ծրագիր:
««Երեխաների քաղաքը» նախատեսված է ստեղծել որպես ոչ ֆորմալ կրթության օղակ, ստեղծարար կենտրոն, որտեղ ՀՀ ամբողջ տարածքից 14 տարեկանից բարձր դեռահասներն ու երիտասարդները կարող են ստանալ մասնագիտացում (հիմնականում՝ արհեստագործական) և կյանքի հմտություններ։ Կենտրոնը հարմարեցված և մատչելի կլինի բոլոր երեխաների համար»,- «Արմենպրես»-ի հետ զրույցի ժամանակ նշեց «Հայկական Կարիտաս» բարեսիրական ՀԿ-ի գործադիր տնօրեն Գագիկ Տարասյանը՝ տեղեկացնելով, որ ծրագիրը մշակվել է նախ ՀՀ աշխատանքի և սոցիալական հարցերի նախարարության, ապա ՀՀ կրթության, գիտության, մշակույթի և սպորտի նախարարության համագործակցությամբ։
Ըստ ՀՀ կառավարության որոշման՝ ստեղծարար կենտրոնին տրամադրվել են Շահումյան համայնքից՝ 14,9 հա և Տափերական համայնքի վարչական տարածքից՝ 10,2 հա մակերեսով հողամասեր:
Որպես ծրագրի մեկնարկ հայտարարված է 2021 թվականի սեպտեմբերի 1-ը, ավարտ՝ 2026-ի դեկտեմբերի 31-ը:
Արմենուհի Մխոյան
Բաժանորդագրվեք մեր ալիքին Telegram-ում