Գրողների միությունում նշվեց պոեզիայի միջազգային օրը
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Գրողների միությունում նշվեց պոեզիայի միջազգային օրն ու Եղիշե Չարենցի ծննդյան 125-ամյակը:
«Արմենպրես»-ի փոխանցմամբ՝ միջոցառմանը ներկա էին ՀՀ-ում հավատարմագրված դեսպանությունների և ազգային փոքրամասնությունների ներկայացուցիչներ:
Գրողների միության նախագահ էդվարդ Միլիտոնյանը նշեց, որ մեծ ուրախությամբ ամեն տարի նշում են պոեզիայի միջազգային օրը, քանի որ աշխարհի բոլոր ժողովուրդների միջև ամենագեղեցիկ, ամենախորը մարդկային կամուրջը պոեզիան է:
«Նշեմ, որ այս տարի պոեզիայի օրը նվիրվում է մեր հանճարեղ բանաստեղծ Եղիշե Չարենցին, որը իր ստեղծագործություններով մշտապես կապված է համաշխարհային գրականության հետ: Երբ ընթերցում ենք նրա գրքերը, զգում ենք, որ բանաստեղծը իրեն հոգով տեղափոխել է աշխարհի կենտրոններ, և աշխարհը գեղեցկությամբ և սիրով ներգրավվել է նրա ստեղծագործություններում»,- ասաց Միլիտոնյանը:
Երևան քաղաքի Կենտրոն վարչական շրջանի ղեկավար Ավետ Պողոսյանն էլ ընդգծեց, որ վերջին երկու տարիների ընթացքում շատ մեծ փոփոխություններ են իրականացրել իրենց ֆինանսական ծախսերի մեջ, և գրեթե բոլոր ծախսերը նվազել են: «Այս ծրագիրը, որ մենք իրականացնում ենք Գրողներ միության հետ, այն հազվադեպ ծրագրերից մեկն է, որի բյուջեն մենք ավելացրել ենք»,- ասաց Պողոսյանը:
Այս տարվա պոեզիայի միջազգային օրը ամբողջությամբ նվիրված էր Չարենցի ծննդյան 125-ամյակին. միջոցառման ընթացքում ՀՀ-ում հավատարմագրված դեսպանությունների և ՀՀ-ում ազգային փոքրամասնությունների ներկայացուցիչները ընթերցեցին Չարենցի ստեղծագործությունները տարբեր լեզուներով:
Բաժանորդագրվեք մեր ալիքին Telegram-ում