Տավուշում մեկնարկել է հանրակրթական դպրոցների տնօրենների օգոստոսյան խորհրդակցությունը
ԻՋԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: ՀՀ Տավուշի մարզում մեկնարկել է հանրակրթական դպրոցների տնօրենների օգոստոսյան խորհրդակցությունը, որի ընթացքում քննարկվեցին նոր ուսումնական տարվա նախապատրաստական աշխատանքները: Տավուշի մարզից հետո Կրթության, գիտության, մշակույթի և սպորտի նախարարությունը նախատեսում է խորհրդակցություններ անցկացնել նաև Հայաստանի մյուս մարզերում և Երևանում: Խորհրդակցությանը մասնակցում էին Տավուշի մարզի 82 հանրակրթական ուսումնական հաստատությունների տնօրեններ ու փոխտնօրեններ, ՀՀ Տավուշի մարզպետարանի, ԿԳՄՍ նախարարության և ԿԶՆԱԿ-ի պատասխանատուներ:
«Արմենպրես»-ի թղթակցի հաղորդմամբ՝ խորհրդակցությանը ԿԳՄՍ նախարարի տեղակալ Ժաննա Անդրեասյանը՝ նոր 2022-2023 ուսումնական տարվան ընդառաջ ներկայացրեց հանրակրթության պետական նոր չափորոշիչների ներդրման ընթացքը, արդյունքը և մի շարք փոփոխություններ, որոնք իրականացվելու են նոր ուսումնական տարում:
Անդրադառնալով օգոստոսի 14-ին Երևանում տեղի ունեցած պայթյունին՝ Անդրեասյանը նախ և առաջ ընդգծեց անվտանգության կանոնների պահպանման և կիրառման վերաբերյալ գիտելիքների տրամադրման կարևորությունը՝ առաջարկելով տնօրեններին մեծ ուշադրություն դարձնել դպրոցներում անվտանգության վերաբերյալ կարևոր նյութերի դասավանդման կազմակերպմանը, որում նախարարությունը պատրաստ է աջակցություն ցուցաբերել՝ համապատասխան գերատեսչությունների հետ համագործակցելով :
Նոր չափորոշչի ներդրման մասին Տավուշի մարզի տնօրեններին ուղղված խոսքում Անդրեասյանը կարևորեց հանրակրթության նոր չափորոշիչի փորձարկումը, որը մարզի դպրոցներում կատարվում է նախորդ ուսումնական տարվանից սկսած և շարունակվելու է այս տարի։
«Պատահական չէ, որ օգոստոսյան խորհրդակցությունը սկսել ենք հենց Տավուշի մարզից, քանի որ մարզում արդեն մեկ տարի է ներդրվել է կրթական նոր չափորոշիչը, որի հաջող ավարտից հետո այն կներդրվի նաև մյուս մարզերում: Մենք նաև Դիլիջանում վերջերս ամփոփեցինք մեկ տարվա փորձարկման արդյունքները և արձանագրեցինք, որ ունենք բավական մեծ առաջընթաց»,- ասաց նախարարի տեղակալը:
Ժաննա Անդրեասյանը նշեց, որ 2022 թվականի նոր ուսումնական տարում նախարարությունը կապահովի լաբորատորիաների գործարկման ծախսերը, քանի որ, երբ լաբորատորիաները սկսեն գործարկվել ըստ չափորոշիչների, ամբողջ տարվա ընթացքում կարիք է լինելու ձեռք բերել նոր նյութեր և դրանք պատշաճ պահպանել:
Անդրադառնալով ատեստավորմանը՝ փոխնախարարը նշեց, որ այն վերապատրաստումը, որ ստացել են ուսուցիչները Տավուշի մարզում 2021 թվականին ՝ նոր չափորոշիչները փորձարկելու համար, նրանց հնարավորություն է տվել ավտոմատ ատեստավորվելու. «Այս տարի նույնպես ուսուցիչները այդ հնարավորությունը կստանան»,- ասաց փոխնախարարը:
Տնօրեններին վերաբերվող նոր սահմանափակումների վերաբերյալ Անդրեասյանը ընդգծեց, որ փոփոխությունը ներկայացվել է հանրակրթության օրենքի փոփոխությունների ժամանակ, և ընդունվել է 2022 թվականի մարտի 3-ին: «Այս փոփոխությամբ մենք կարգավորել ենք այն դեպքերը, թե որ պարագայում հնարավորություն կստեղծվի վարչական աշխատողների, տնօրենների և փոխտնօրենների դասավանդման համար: Մենք պետք է կարողանանք առավելագույն ժամաքանակով ապահովել դպրոցի գործող ուսուցիչներին և վարչական աշխատողների դասավանդումը դիտել իբրև տարբերակ՝ անհրաժեշտությունից ելնելով»,- ասաց նա:
Այս տարի նաև իրականացվելու է տնօրենների ատեստավորում: Այժմ մշակվում է նոր կարգ, որը ենթադրվում է, որ ուժի մեջ կմտնի 2023 թվականի սեպտեմբերից և հնարավորություն կտա բարձրացնել տնօրենների, փոխտնօրենների և մնացած վարչական աշխատողների աշխատավարձերը:
Կրթության զարգացման նորարարությունների ազգային կենտրոնի տնօրենի պաշտոնակատար Արտաշես Թորոսյանը ներկայացրեց ուսումնական պլանների, թեմատիկ պլանավորման, տնօրենների վերապատրաստման, կրթության զարգացման նորարարությունների ազգային կենտրոնի կողմից ուղեցույցների ստեղծման և մի շարք այլ խնդիրների շուրջ կատարված աշխատանքները:
Նա նշեց, որ ԿԶՆԱԿ-ի աշխատակիցները մարզի դպրոցների ուսմասվարներին են ներկայացնում նոր ուսումնական մասում նախատեսված անելիքները և նոր ուսումնական մեթոդական ձեռնարկները և դրանց ճիշտ կիրառման մեթոդները:
Խորհրդակցության ընթացքում նախարարի տեղակալն ու մյուս պատասխանատուները պատասխանեցին տնօրենների հարցերին, որոնք վերաբերվում էին դպրոցների շենքերի տեխնիկական վիճակին, աշխատավարձերի բարձրացմանը, ատեստավորմանը և մի շարք այլ խնդիրների։
Գայանե Գաբոյան
Բաժանորդագրվեք մեր ալիքին Telegram-ում