Ժամանակը Երևանում՝ 11:07:36,   25 Մայիս 2022

Փաշինյանը շատ իմաստուն վարվեց. ռազմական փորձագետը՝ Ղազախստան ՀԱՊԿ խաղաղապահ ուժեր ուղարկելու որոշման մասին

Փաշինյանը շատ իմաստուն վարվեց. ռազմական փորձագետը՝ Ղազախստան ՀԱՊԿ 
խաղաղապահ ուժեր ուղարկելու որոշման մասին

ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Հավաքական անվտանգության պայմանագրի կազմակերպության (ՀԱՊԿ) խաղաղապահ ուժերի առաքելությունը Ղազախստանում, որն, ըստ էության, կոլեկտիվ արձագանքման առաջին իրական գործողությունն է կազմակերպության պատմության մեջ, էապես կբարձրացնի ՀԱՊԿ-ի միջազգային հեղինակությունը:

«Արմենպրես»-ի հետ զրույցում այդպիսի կարծիք հայտնեց Մոսկվայի Քաղաքական և ռազմական վերլուծությունների ինստիտուտի փոխտնօրեն Ալեքսանդր Խրամչիխինը՝ շեշտելով, որ Հայաստանը, որպես ՀԱՊԿ Հավաքական անվտանգության խորհրդի նախագահող, ինչ-որ առումով վճռական դեր խաղաց այդ գործընթացում:

«Ըստ երևույթին, Փաշինյանը ինչ-որ չափով միտումնավոր է այդպիսի ակտիվ դեր խաղում հենց այն պատճառով, որ սրանից հետո համանման իրավիճակում արդեն շատ ավելի դժվար կլինի Հայաստանի խնդրանքը մերժելը: Այսինքն՝ տվյալ պարագայում նա շատ իմաստուն վարվեց: Դա շատ խելացի քայլ էր Փաշինյանի կողմից: Բայց նախ և առաջ նա, իհարկե, խորհրդակցել է ՀԱՊԿ առաջնորդների հետ», - մեկնաբանեց Ալեքսանդր Խրամչիխինը:

Ռազմական փորձագետի խոսքով՝ Ղազախստանում սկսված խաղաղապահ առաքելությունը ՀԱՊԿ երկրների զինված ուժերի առաջին ոչ ուսումնական համատեղ գործողությունն է կազմակերպության ողջ պատմության մեջ, և կարելի է արձանագրել, որ ՀԱՊԿ-ը վերջապես սկսեց աշխատել որպես հավաքական անվտանգության իրական մեխանիզմ:

«Սա շատ էապես կբարձրացնի ՀԱՊԿ-ի միջազգային հեղինակությունը, եթե նա իրեն այդպես դրսևորեց», - նշեց ռազմական փորձագետը:

Ինչ վերաբերում է Ղազախստանում տեղի ունեցող տագնապալի իրադարձություններին՝ ռուսաստանցի փորձագետը կարծում է, որ դրանք ի վերջո կավարտվեն խռովության ճնշմամբ: Ընդ որում, Խրամչիխինի կարծիքով՝ ՀԱՊԿ-ը մեծ դեր է խաղում այդ հարցում՝ չնայած այն հանգամանքին, որ այդ երկիր ուղարկված խաղաղապահ ուժերի զորակազմը մեծաթիվ չէ:

«Կարևորը դա չէ: Կարևորն այն է, որ ՀԱՊԿ-ը այնտեղ է: Իսկ դա նշանակում է, որ արդեն, ինչպես ասում են, փախչելու տեղ չկա: Եվ այդ ժամանակ ղազախական իրավապահ մարմիններն էլ ստիպված կլինեն աշխատել», - ասաց Ալեքսանդր Խրամչիխինը:

ՀԱՊԿ անդամ Ղազախստանի Հանրապետության մի շարք բնակավայրերում տարվա առաջին օրերից՝ հունվարի 2-ից սկսվել էին բողոքի ցույցեր, որոնք հետագայում վերաճեցին զանգվածային անկարգությունների, հարձակումներ իրականացվեցին պետական մարմինների վրա: Անկարգությունների հետևանքով տուժել են հազարավոր մարդիկ, այդ թվում կան բազմաթիվ զոհեր: Իրավիճակը ծանր էր հատկապես նախկին մայրաքաղաք Ալմաթիում, որտեղ ցուցարարները գրավել էին նախագահի նստավայրը, քաղաքային վարչակազմի շենքը, Ազգային անվտանգության կոմիտեի վարչության, «Ղազախստան» և «Միր» հեռուստաընկերությունների մասնաճյուղերի շենքերը, ինչպես նաև օդանավակայանը: Նույնիսկ կառավարության հրաժարականը և հեղուկ գազի գների բարձրացման մասին որոշման չեղարկումը չհանդարտեցրին իրավիճակը, և նախագահ Կասիմ-Ժոմարտ Տոկաևը ստիպված էր արտակարգ դրության ռեժիմ սահմանել Ղազախստանի ողջ տարածքում:

Հունվարի 5-ի երեկոյան Ղազախստանի նախագահ Կասիմ-Ժոմարտ Տոկաևը հայտարարեց, որ դիմել է ՀԱՊԿ անդամ պետությունների ղեկավարներին երկրում ահաբեկչական սպառնալիքը կանխելու հարցում օգնելու խնդրանքով: Քիչ անց ՀՀ վարչապետ Նիկոլ Փաշինյանը տեղեկացրեց, որ որպես ՀԱՊԿ Հավաքական անվտանգության խորհրդի նախագահ ինքն անհապաղ խորհրդակցություններ է սկսում ՀԱՊԿ երկրների ղեկավարների հետ Ղազախստանում տիրող իրավիճակի վերաբերյալ:

Հունվարի 6-ին Նիկոլ Փաշինյանը հայտարարեց, որ «Ղազախստանի Հանրապետության նախագահ Կասիմ-Ժոմարտ Տոկաևի դիմումի հիման վրա և Ղազախստանի ազգային անվտանգությանն ու ինքնիշխանությանը սպառնացող վտանգների բերումով, որն առաջացել է այդ թվում՝ արտաքին միջամտության հետևանքով, ՀԱՊԿ Հավաքական անվտանգության խորհուրդը Հավաքական անվտանգության պայմանագրի 4-րդ հոդվածի համաձայն՝ որոշում է կայացրել սահմանափակ ժամանակահատվածով Ղազախստանի Հանրապետություն ուղարկել ՀԱՊԿ հավաքական խաղաղապահ ուժեր՝ այդ երկրում իրավիճակի կայունացման և կարգավորման նպատակով»:

Նույն օրը ՀՀ կառավարությունը ընդունեց որոշում, որով թույլատրվում է ՀԱՊԿ անդամ պետությունների խաղաղապահ զորախմբերում ընդգրկված ՀՀ զինված ուժերի ստորաբաժանմանը մասնակցել Ղազախստանում իրականացվող խաղաղապահ գործողություններին: ՀԱՊԿ Հավաքական անվտանգության խորհրդի որոշման համաձայն հունվարի 7-ին սահմանափակ ժամանակահատվածով Ղազախստան ուղարկվեցին ՀԱՊԿ հավաքական խաղաղապահ ուժեր, որոնց մեջ ընդգրկված է 100 հայ զինծառայողից բաղկացած ՀՀ ԶՈՒ ստորաբաժանումը: ՀՀ ԱԳՆ խոսնակի հաղորդմամբ՝ հայ խաղաղապահների խնդիրը ռազմավարական նշանակության օբյեկտների պահպանությունն է լինելու:

ՀԱՊԿ-ը հավաքական անվտանգության ապահովման նկատառումներով ստեղծված միջազգային ռազմաքաղաքական կազմակերպություն է, որի մասին Պայմանագիրը ստորագրվել է 1992 թ. մայիսի 15-ին Հայաստանի Հանրապետության, Ռուսաստանի Դաշնության, Ղազախստանի, Ղրղզստանի, Տաջիկստանի և Ուզբեկստանի ղեկավարների կողմից: Ներկայում կազմակերպությանը անդամակցում են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը: Հայաստանը նախագահելու է ՀԱՊԿ Հավաքական անվտանգության խորհրդում 2021-2022 թթ. ժամանակահատվածում:

Ղազախստանի իրավապահ մարմինները նշված դեպքերից հետո ձերբակալել են զանգվածային անկարգությունների ավելի քան 4200 մասնակցի, այդ թվում՝ օտարերկրացիների: Ներքին գործերի նախարարությունը նաև հրապարակել է անկարգությունների ժամանակ զոհված 7 ոստիկանների անունները:

 

Արամ Սարգսյան

 

 

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]