ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: Իտալիայի Սենատի նիստի ավարտին սենատոր Մարիա Ռիձձոտին (Ադրբեջանի հետ բարեկամության խմբի անդամ) փետրվարի 21-ին ելույթ է ունեցել Խոջալուի իրադարձությունների վերաբերյալ՝ ամբողջովին արտահայտելով ադրբեջանական տեսակետները և կոչ արել փետրվարի 26-ը հռչակել Սենատում «Խոջալուի ցեղասպանության զոհերի» հիշատակի օր:

Ռիձձոտիի ելույթը աջակցություն չի ստացել Սենատում: Ինչպես հաղորդում է «Արմենպրես»-ը, փետրվարի 22-ին սենատի նիստի ավարտին սենատոր Ալդո Դի Բիաջիոն հանդես է եկել Մարիա Ռիձձոտիի ելույթի քննադատությամբ` նշելով, որ այն շատ միակողմանի բնույթ է կրում և հենվում միայն ադրբեջանական ապատեղեկատվության վրա:

Սենատորն իր ելույթում նշում է, որ անդրադարձ կատարել Խոջալուի իրադարձություններին և խոսել «ցեղասպանության» մասին, նշանակում է ընդունել միակողմանի տեսակետ, որը պատշաճորեն համակարգված է Բաքվի կառավարության կողմից, սակայն հերքված  փաստերով:  «Չկա որևէ հղում ոչ այն փաստին, որ Լեռնային Ղարաբաղի հայերը վերահաստատել են իրենց ինքնորոշման իրավունքը անկախության համար հանրաքվեի միջոցով»,- ասել է իտալացի սենատորը: Դի Բիաջիոն շեշտում է նաև, որ գործընկերոջ ելույթում անտեսվել են Բաքվի կառավարության սադրանքները և հայատյացությունը, որոնք խոչընդոտում են Մինսկի խմբի միջնորդությամբ խաղաղ կարգավորման բանակցությունների առաջընթացին:

«Անտեսել  այս ամենը՝ նշանակում է անտեսել փաստերը և  փոխանցել մասնակի տեղեկատվություն, ինչի դեպքում կա վտանգ, որ այն կարող է ընդունվել որպես  ճշմարտություն, քանի որ հարցը  բարձրացվել է Հանրապետության Սենատի պես հեղինակավոր հաստատությունում, մինչդեռ սա շատ լուրջ երկիր է»,- ամփոփել է Ալդո Դի Բիաջիոն: